Isumasiuineq: Siumut IA-lu siuariassasut

Isumasiuinermi nutaami innuttaasut aalajangersimasumik amerlassusillit aperineqarsimapput, qinersisoqartuuppat kikkunnik taasiniarnersut.

Demokraatit qinersisartumik 365 procentiinik annaasaqartussaarpasipput, Inuilli Ataqatigiit Siumulu siuariassangatinneqarlutik.

- Paasissutissaatitta ukiut marluk matuma siornatigut isumasiuisimanitta assiganik pisoqassasoq takutippaa, tassalu aqangu Inatsisartunut qinersisoqartuuppat partiit anginerit marluk siuariartussaasut, Rasmus Leander Nielsen Ilisimatusarfimmi Inuiaqatigiilerinermi adjuktiullunilu misissueqataasimasoq oqarpoq.

Misissuisimaneq

Paasissutissat Ilisimartusarfiup aamma Konrad Adenauer Stiftungip Stockhomimiittutp suleqatigiinnerisigut katersorneqarsimapput. Misissuinermi anguniarneqarsimavoq, innuttaasut nunanut allanut isumannaallisaanermullu politikkimut isumaat pillugit paasissutissanik katersinissaq. Partiimut qinersisimaneq tunngavittut atorneqarsimalluni.

Paasissutissat pissarsiarineqarsimasut tamarmiusut qularnassusaat 2.5-3 procentiuvoq, uppernassusaalu 95 procentiulluni. Apeqqutini akisassani arlalinni tunngavigineqarsimavoq, partiimik qinersisineq pillugu apeqqutit nangaanartortaqarnerat.

Inuit Ataqatigiit 2018-imi qinersisoqarmalli ni procentingajammik siuariarsimapput. Siumut aamma siuariarsimavoq, 3,6 procentiinnarmilli siuariarsimalluni.

- IA siuariarnerpaasussatut isikkoqarpoq, naak partii nutaamik siulittaasortaaqqammigaluarluni politikkikkut partiillu aaqqissuussaaneranik tunngavissamik suli nassaarniartumik. Partii aqqaneq-marlunnik qinigaatitaqarniarpasippoq, tassa ullumimut sanilliullugu sisimanik amerlanerusunik.

Qinigaasulli aqqaneq-marlussaat aporfeqarsinnaavoq, tassa qinersisut taaguussimasaat nikinganeqalaarpata, Naleraq Nunattaluunniit Qitornai sinnerlugit qinigaasoqarsinnaammat.

Siumut siuarialaassasoq

Siumumi ilaasortat akunnerminni piffissami sivisuumi aaqqiagiinngissuteqarsimanerat qaammatip ataatsip matuma siornatigut siulittaasumik nutaamik qinersisoqarneranik malitseqartumik aamma Naalakkersuisut nuannarineqanngitsunik iliuuseqartaraluartut Siumut sinnerlugu Inatsisartuni ilaasortaatitai qulingiluaniit qulinngussangaluarput.

- Demokraatit kinguariarnerannit pissuteqartumik qinigaatitat amerlavallaannginnissaat aamma partiit marlussuit isumasiuineq naapertorlugu ilaasortaatitaqarunnaarnissaat ilimanarpoq, Rasmus Leander Nielsen naliliivoq.

Apersuilluni misissuineq novembarip qeqqata missaanniit decembarip qeqqata missaanut ingerlanneqarpoq. Tassa Siumumi siulittaasussamik suli qinersisoqanngitsoq qinersisoqareersorlu.

Erik Jensenip tunuliaqutai ersernerluttut

HS Analyse oqarasuaatikkut apersuilluni misissuisimavoq, misissuisarfiullu siusinnerusukkut IA qinersinermi inernit amerlanerusunik taaguunneqassatissimavaa. Misissuisut taamaammat akissutigineqartut maannakkut eqqumaffigisimavaat.

- Misissuinerup ingerlanerani HS Analyse oqaloqatigilluartarsimavarput, kingusinneruskkullu tunuliaqutaasut arlallit (najugarisaq, suiaassuseq, qanoq ukioqarneq, ilinniagaqarneq suliffeqarnerlu il.il.) eqqarsaatigalugit misissuisimanerup uppernassusaanut atatillugu paasissutissat pissarsiarisimasavut misissoqqissaarsimallutigit, tamaammat misissuinermi siunertaq eqqarsaatigalugu paasissutissat Kalaallit Nunaanni tamarmi atorneqarsinnaallutillu uppernartuusutut isigivagut, Rasmus Leander Nielsen erseqqissaavoq.

Misissuinermi akissuteqartunit tamanit partiimik sorlermik qinersisoqarnissaa pillugu akissuteqartunit 426-t (61 pct.) akissuteqarsimapput.

Inuit 700-t misissuinermut akissuteqartut pingajorarterutaasa partiimik sorlermik taasinissartik suli ilisimanngilaat, tamannalumi aamma 2019-imi januaarip qaammataani isumasiuinermit taamaappoq.

- ’Naluaramik’ akissuteqartut nuna tamakkerlugu siammarsimasuupput, soqutiginartorli tassaavoq Siumumik qinersisartut tassani amerlanerunerat, tassa Erik Jensenip aggerfianeersut taamatut akissuteqarsimasut amerlanerullutik, aamma oqarasuaatikkut apersuisoqarnerata nalaani Siumut partiia illoqarfimmit Erik Jensenip najugaqarfianeersumik siullermeersumik siulittaasortaarfiani, Rasmus Leander Nielsen oqarpoq.