Isumasiuineq: Qinersinermi allannguuteqartoqarnissaanik ilimasaarisoq
Qinersisartunik isumasiuineq nutaaq, AG-mit sapaatip-akunnerani saqqummersumi pisiniarfinni pisiarineqarsinnaaleqqammersumi saqqummiunneqartoq, naapertorlugu naalakkersuinikkut immaqa allanngortoqassaaq.
Inuit Ataqatigiit apriilip 6-ani Inatsisartunut qinersinermi siuariangaatsiartussatut inissisimapput. Tamanna isumasiuinermit nutaamit HS Analysemit aamma Tusagassiorfimmit Sermitsiaq.AG-mit suleqatigiilluni suliarineqarsimasumi takutinneqarpoq. Kalaallit Nunaanni innuttaasut katitigaanerisa agguataarsimanerannut sinniisuusutut naapertuuttut marsimi aperineqarsimapput ullumikkut Inatsisartunut qinersisoqartuugaluarpat kikkunnik taasiniarnerannik.
Isumasiuineq naapertorlugu IA qinersisartut tapersersuinerannik 36 procentiusumik angusaqassaaq, tamannalu 10 procentpointimik siuariarnerussaaq. Tamanna 2018-imi qinersinermut sanilliuugu ilaasortaatitat sisamanik amerlanerulernerannik kinguneqassaaq, taamaalillunilu partii 12-nik ilaasortaatitaqalerluni Inatsisartuni partiini anginerpaanngussalluni.
IA-p siulittaasua Múte B. Egede isumasiuinermik nuannaarutiginnippoq.
- IA-mi qineqqusaarnerup nalaani isumalluartoqarnera ersarissumik malugaarput. Pingaartumik sinerissami. Kisianni uannut pingaaruteqarpoq erseqqissaatigissallugu, qinersineq ullormi qinersivimmi aalajangiivigineqassammat, isumasiuinermiunngitsoq, oqarpoq.
- Isumasiuineq naapertorlugu sooq IA ajugaasussatut inissisimasoraajuk?
- Misigisimavugut qinersisartut apeqqutinik pingaartitatta assinginik pingaartitsisut. Atugarissaarnermi ajornartoorneq aaqqinneqartariaqartoq. Innuttaasut inuuniarnermi atugarisaat pitsanngorsarneqartariaqartut. Tamatuma peqatigisaanik piujuaannartitsisumik ineriartornermut uranimullu isumarput aamma aamma pineqarput, Múte B. Egede akivoq.
- Isumasiuineq eqquutissappat kikkut naalakkersuisoqatigiinnik pilersitseqatigisinnaanerat takorloorpiuk?
- Partiinik siumoorluta mattussinngilagut. Uagutsitut ineriartornermik assingusumik kissaateqartunik isumaqatigiissutinillu siamasissunik qinigaaffinni arlalinni atuussinnaasunik pingaartitsisunik suleqateqarnissarput soqutigaarput, Múte B. Egede akivoq.
Múte imaluunniit Asii?
IA sinnerlugu kommunimut qinersinerni siusinnerusukkut taaguunneqarluartartoq, Asii Chemnitz Narup, qinigassanngortippoq. Taassuma nuannarineqarluarnera taanna Múte B. Egedemit taasinernik amerlanerusunik pissarsissagaluarpat kia IA qinersinerup kingorna siulersussagaa isumaliutinik pilersitsisimavoq. Tassa Siumumi Erik Jensenimut Kim Kielsenimut atatillugu pissutsinut assingusumik.
- Taavami illit Asiitut amerlatigisunik taaguunneqanngeriataassagaluaruit?
- IA-mi uanga qinersineq sioqqullugu siulittaasuuvunga - aamma qinersinerup kingorna. Uanga aqutsisuuffimmik tigummiartuuvunga. Partiitsinni apeqqut tamanna nalornissutigineqanngilaq. Siulittaasuuvunga, aamma qinersinerup kingorna taama pisoqassappat uanga Naalakkersuisunut siulittaasuussaanga, Múte B. Egede akivoq.
Siumut Demokraatillu
Siumut 2018-imi qinersinermi kinguariarpoq, qinersisartunillu isumasiuineq nutaaq atuaraanni kinguariarneq tamanna immaqa ingerlaqqissinnaavoq.
Partii taasinerit 23,2 procentiinik pissarsisussatut inissisimavoq, 2018-imi 27,3 procentinik pissarsimalluni 4,1 procentpointinik kinguariassalluni. Tamanna Siumup qulingiluanik ilaasortaatitaqarnermit arfineq-pingasunik ilaasortaatitaqalerneranik isumassagaluarpoq, tamannalu Namminersornerulluni Oqartussaanerup eqqunneqarneraniit partiip aatsaat taama ikitsigisunik ilaasortaatitaqalerneranik isumaqassalluni.
Demokraatit aamma kinguariartussatut inissisimapput, Atassutillu ilaasortaatitani marluk aalajangiusimaannassallugu.
Isumasiuineq marsimi 2021-mi oqarasuaatikkut inunnik 18-ileereersimasunik nalaatsornikkut toqqakkanik 706-inik apersuineq iluaqutigalugu ingerlanneqarsimavoq. Nalorninassuseq 2,8 procentiusutut naatsorsorneqarsimavoq. Isumasiuineq arnaaneq angutaanerlu, najugaqarfik (illoqarfik/nunaqarfik, najugaqarfik (nunap immikkoortua) ukiullu eqqarsaatigalugit innuttaasut katitigaanerannut naapertuuttuusoq, HS Analyse paasissutissiivoq.
ISUMASIUINEQ PILLUGU ALLAASERISAT TAMAASA AG-MI ATUAKKIT: