aatsitassarsiorneq
Isumasiuineq: Namminersorlutik Oqartussat innuttaasut tusaanianngilaat
Innuttaasut isumaannik paasiniaanerup takutippaa innuttaasut aatsitassanut tunngasut tusarniaassutigisarnerinut atatillugu tusaaniarneqanngitsutut misigisimasut
ICC-Kalaallit Nunaata aamma WWF-Verdensnaturfondip aatsitassanut tunngatillugu innuttaasut peqataatinnerannik nalunaarusiaata kingulliup saqqummersinneranut atatillugu, HS-Analyse-p Kalaallit Nunaanni isumasiuilluni misissuinerata takutippaa, innuttaasut isumaqartut Namminersorlutik Oqartussat uuliasiornermik aatsitassarsiornermillu ingerlatsiviit allanut naleqqiullugit tusaaniarnerugaat.
Taamaalilluni isumasiuinerup takutippaa aperineqartut sisamaraterutingajaat isumaqartut, Namminersorlutik Oqartussat uuliasiornermik aatsitassarsiornermillu ingerlatsiviit tusaaniarnerugaat, aperineqartullu quliugaata taamaallaat ataaseq isumaqarluni innuttaasut tusaaniarneqarnerusartutut.
Aammattaaq aperineqartut 10 %-ii isumaqarput immikkut ilisimasallit arlaannaannulluunniit attuumassuteqanngitsut tusaaniarneqarnerusut, 10%-iilu isumaqarlutik soqutigisaqaqatigiit tusaaniarneqarnerusut.
Aperineqartut arfineq-pingasuugaangata taamaallat ataaseq isumaqarpoq Namminersorlutik Oqartussat illuatungeriit tamaasa naligiimmik tusaaniartaraat.
- Ajoraluartumik misissuinerup ilimagisarput uppernarsivaa, tassalu innuttaasut isumaqartut uuliasiornermik aatsitassarsiornermillu ingerlatsivittulli isummatik pimoorutsigineqanngitsut. Tamanna anguniagarinngilarput. Namminersorneq eqqunneqanngilaq, aatsitassarsiornermik uuliasiornermillu ingerlatsivinnut immikkut ilisimasalinnit arlaannaannulluunniit attuumassuteqanngitsunit innuttaasunillu politikerit tusaaniarnerunissaat siunertaralugu. Aammattaaq misissuinerup takutippaa, naqisimaneqanngitsumik, siumoortumik ilisimatitsissuteqarfiusumillu akuersisarnermik tunngavik Kalaallit Nunaanni aalajangiisartutut oqartussaasunit malinneqangitsoq Hjalmar Dahl, ICC-Kalaallit Nunaata siulittaasua oqarpoq.
- Innuttaasut peqataatinnerat tassaanngippat innuttaasut tusaaniarneqarnerunerat, paarlattuanillu innuttaasut misigisimappata Namminersorlutik Oqartussat suliffissuarnik ingerlatsisut pingartinnerugaat, taava ajorluinnartoqassaaq, Gitte Seeberg, WWF Verdensnaturfond-imi allattaaneq oqarpoq.
Misissuinerup aammattaaq takutippaa taamaallaat aperineqartut 12 %-ii isumaqartut, aatsitassaqarnermut tunngasutigut Namminersorlutik Oqartussat innuttaasut peqataatinneqarnerunissaasa qularnaarnissaat siunertaralugu suliniutaat ”ajunngivissuusimasut”.
Akerlianik aperineqartut 15 %-iisa missaat isumaqarput Namminersorlutik Oqartussat suliniutaat ”pitsaanngitsut”, sulilu 34 %-it suliniutit nalilerpaat ”pitsaavallaanngitsutut”.
- Politikerit kaammattuinnarsinnaavagut innuttaasut pitsaasumik peqataatinissaannut nukissat annertunerusut atoqqullugit. Pingaartuuvoq Kalaallit Nunaata sammiviginiakkatut toqqagaanut innuttaasut tamatigoortumik tapersersuinissaasa qularnaarnissaat, aamma pingaartuuvoq ineriartornerup taamaallaat ingerlatsivinnut nunanit allaneersunut iluaqutaanani aammali innuttaasunut iluaqutaanissaata qularnaarneqarnissaa, suliniaqatigiiffiit marluk oqaatigivaat.
Nalunaarusiaq kingulleq maanna saqqummersoq nalunaarsusiat siuliisa tallimat eqikkarnerivaat, piffissami kingullermi pineqartut iluanni ineriartorneq pillugu allaaserisanik tapertaqartinneqartoq. Nalunaarusiaq ICC-miit Mads Fægteborg-imit WWF-imiillu Mette Frost-imit suliarineqarpoq.
Misissuinermut tunngaviupput Kalaallit Nunaanni inuit 735-t september 2014-imi telefonikkut apersorneqarnerat.