Skip to main content

Isumaqatiginninniarnerit suli ingerlapput - Siumut suli isumaqatiginninniaqataavoq

Siumumit naalakkersuisunngortitsiniarnermi erseqqissaasoqarnissaa amigaatigineqarpoq, IA-li suli oqaloqatigivaat.

IA-p pingaarnerutititaminik assigiinngitsunik isumaqatiginninniarnissaq oqaatigisimavaa, pingaarnerutitatik pillugit partiit isumaannik paasinnikkusupput. Erik Jensenip Sermitsiaq.AG-mut ilisimatitsissutigaa, Siumut akissuteqarsimasoq aamma isumaqatiginninniarnerit suli ingerlasut.

- Suleqatigiinnermi naaperiutaasinnaasut assigiinngitsut saqqummiussimavavut, taakkununngalu IA peqataarusunnerluni aalajangiisussaavoq, Erik Jensen oqarpoq.

Taassuma oqaatigerusunngilaa IA-p anguniagaasa annersaat, tassalu Kuannersuarni aatsitassarsiorniarnermut tunngasoq isumaqatiginninniutigineqartunut ilaanersoq, oqaatigaali piumasaqaatinut isumaqatiginninniutaanngitsunut atatillugu unammillernartoqarsinnaasoq.

- Piumasaqaatit avaqqunneqarsinnaanngitsut aallaavigalugit isumaqatiginniaruminaappoq, Erik Jensen oqarpoq.

Pingaarnerutitanik takunnikkusuttoq

Taassuma neriuutigaa, isumaqatiginninniarnerit ingerlateqqinneqarneranni IA saqqummiussamini immikkuualuttunik erseqqissaassuteqarumaartoq.

- IA-mit saqqummiunneqartut qanorpiaq imaqarnersut erseqqinnerusumik takorusuppavut. Assersuutigalugu saqqummiunneqartunut atatillugit aningaasaqarnikkut kinguneqaataasinnaasut aamma qanoq pingaarnersiuisoqarniarnersoq.

Demokraatit IA-kkormiullu namminneq oqaasii naapertorlugit tigussaasumik oqaloqatiginnillunilu isumaqatiginninniartoqareersoq, Demokraatit naalakkersuisooqatigiinnissamut isumaqatiginninniarnermut peqataajunnaarsimavoq. Qinigaaffimmili tulliuttumi partiit ataatsimoorussinnaasaanni suleqataaniarlutik oqaatigisimavaat.

Naleraq Atassullu suli isumaqatiginninniaqataapput. 

Sammisassanik allanik amigaateqartoq

Erik Jensen Siumulu isumaqatiginninniarnermi allanik ilanngusserusupput.

- Pingaarutilittut isigisatta isumaqatiginninniarnerit ingerlanneqarneranni ilanngunneqannginnerat amigaatigaarput, taanna oqarpoq.

Erik Jensenip sorpiaat pineqarnersut oqaatigerusunngilai.

- Tusagassiorfiit aqqutigalugit isumaqatiginniniarusunngilagut. Isumaqatiginninniarnermik aqutsisoq ataqqillugu, taanna oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER