Isumaqatigiittut: Nunarput Danmarkilu oqaluttuarisaaneq pillugu nassuiaasiornialerput
Múte B. Egede aamma ministeriuneq Mette Frederiksen nunarput Danmarkillu akornanni oqaluttuarisaanermi qanoq peqatigiissimanerat pillugu nassuiaasiortoqarnissaanik ataatsimoorussamik nalunaarummik atsiorput. Nassuiaasiornermi sorsunnersuup aappaaniit ullumikkumut susoqarsimanera suliarineqassaaq.
Suut tamarmik saqqummiunneqassapput.
Kalaallit Nunaata Danmarkillu qanoq peqatigiissimanerannut oqaluttuarisaanermi siullermeertumik pisussatut Naalakkersuisut Danmarkillu naalakkersuisuisa akornanni nassuiaasiortoqarnissaanut, Savalimmiuni ataatsimiinnermi atsiortoqareersorlu, Naalakkersuisut Siulittaasuat Múte B. Egede nalunaarpoq.
Nunatta Danmarkillu akornanni oqaluttuarisaanermi qanoq peqatigiittoqarsimanera suliakkiunneqarpoq, piffissarlu sorsunnersuup aappaata kingorna maannamut misissuiffigineqassalluni.
- Ukiuni kingullerni ilisimalersimavagut pisimasut assigiinngitsut alianartut. Pisimasut
inunnut eqqugaasimasunut inuttut annertuumik kinguneqartarsimasut. Inuiaqatigiit Kalaallit
tamarmiullutik oqaluttuarisaanermi pisimasunik qulaajaasoqarnissaa kissaatigaat, Naalakkersuisut siulittaasuat Múte B. Egede atsiornerup kingorna tusagassiorfinnut nalunaaruteqarluni oqarpoq.
Oqaluttuarisaaneq oqaluuserineqassaaq
Meeqqat arnallu 1960-ikkuunniit 1991-imi nunatta peqqinnissaqarfiup akisussaaffigilerneqarnissaanut naartunaveersaasersorneqartarnerat pillugu qulaajarneqarnissaat, Inatsisartut upernaaq maanna isumaqatigiissutigaat. Taassuma saniatigut aamma isumaqatigiissutigineqarpoq naalagaaffiup Naalagaaffiit Peqatigiit nunasiaataasimasunik ineriartortitsinissamut pisussaaffeqarnermikkut pisussaaffini naammassisimaneraa pillugu Naalakkersuisut qulaajaassasut.
Suliat taakku siunnerfeqaqatigiinnerup saniatigut ingerlanneqassasut, Naalakkersuisut Siulittaasuata erseqqissarpaa.
- Oqaluttuarisaanerput oqaluuserissavarput. Ukiut ingerlanerani aalajangiunneqartarsimasut assigiinngitsut tunuliaqutaat qulaajassavagut, Múte B. Egede oqarpoq.
Politikkikkut pissutsit pisimasullu
- Nassuiaasiornermi ilanngunneqartussat tassaapput politikkikkut aalajangiussani pingaarnerit, piffissami tassani pisimasut pissutsillu Kalaallit Nunaata ineriartorneranut sunniuteqaqataasimasut, Kalaallit Nunaata Danmarkillu qanoq peqatigiissimanerannut tunngasut, imaluunniit kalaallinut inuiannut kinguneqarsimasut.
- Sorsunnersuit aappaannit ullumimut, imaluunniit Kalaallit Nunaata susassaqarfiit pineqartut akisussaaffigilerneqarnerisa tungaannut, Kalaallit Nunaata nutarsarneqarnerata nalaani pisat ingerlaatsillu immikkooruteqartut nassuiaasiorfigineqassapput, ataatsimoorussatut nalunaarummi allassimavoq.
Nassuiaasiornissami ilisimatuunit arlaannaanulluunniit attuumassuteqanngitsunit suliarineqartussami Ilinniartitaanermut, Kultureqarnermut,Timersornermut Ilageeqarnermullu Naalakkersuisoqarfik aamma Ilinniartitaanermut Ilisimatusarnermullu Ministeriaqarfik suliakkiissapput.
Suliakkiissut kingusinnerpaamik 2022-mi oktoberip naanerani naammassisimassaaq.