suliffeqarneq
Isumaqatigiissutip nutaap Tasiilami suliffissat qulakkiissavai
Suleqatigiinnissamik isumaqatigiissutip nutaap sisamanngornermi saqqummiunneqartup siunertaa upperissagaanni, Tasiilami innuttaasut suliffissaaleqisut suliffittaarusuttut immaqa siunissaq neriulluarlutik isigisinnaanngorpaat.
- Aalisarnermut Naalakkersuisoq Hans Enoksen aamma Kommuneqarfik Sermersuumi Borgmesteri Asii Chemnitz Narup Tasiilami aalisarnermut inuussutissarsiornerup ineriartortinneqarnissaanut qulakkeerinnittumik suleqatigiinnissamut isumaqatigiissusiorput, sisamanngornermi ualikkut tusagassiuutinut nalunaarummi tamanna atuarneqarsinnaavoq.
Illuatungeriit ataatsimoorlutik Tasiilami piniartutut inuussutissarsiuteqarnermiit aalisartutut inuussutissarsiuteqalernermut ikaarsaarnermik ajornannginnerulersitsinissaq, nalunaarummi takneqarsinnaavoq.
Suut ajornannginnerulersinneqarnissaat nalunaarummi kommunimut qinersinissaq sioqqutilaarlugu nassiunneqartumi oqaatigineqanngillat.
Kisianni isumaqatigiissut suliniutinut pingaarnernut sisamanut iluaqusiissaaq:
Tunitsivimmi pilersitsinissaq
Suleqatigiit ataatsimoorlutik piaartumik tunitsivimmik pilersitsinissamut suliniuteqarsinnaasunut iliuuseqarnissaq siunertaraat, taamaalilluni inuussutissarsiutigalugu aalisarnermut periarfissat piginnaasallu atorluarneqarniassammata.
Inuussutissarsiutigalugu aalisartut
Aalisarnermut Naalakkersuisoqarfimmit aamma Kommuneqarfik Sermersuumit, najukkami aalisartut suliffeqarfiillu aalisarnermut pisassiissutinik pisariaqartinneqartunik tunineqarnissaat, sulissutigineqassasoq isumaqatigiissummi ilanngunneqarpoq. Aalisartut suliffeqarfiillu imminut akilersinnaasumik niuersinnaanissaat qulakkeerneqassaaq.
Najukkami suliffeqarfinnik pilersitsineq
Tunitsivimmik aamma aalisakkanik suliffissuarmik pilersitsineq kiisalu aalisakkanik pisassiissutinik tunniussineq immikkoortumi sulisussaqareersumi, killilimmillu suliffissaqarfiusumi, suliffissaqarnerulersitsissaaq.
Aalisartunik, inuttanik aamma aalisakkerivimmi sulisunik piginnaanngorsaaneq
Tasiilami sulisussaqarpoq, aalisarnermullu tunngasunik pikkorissartitsinerit arlallit ingerlanneqareerlutik. Taamaattorli Naalakkersuisoqarfimmit Kommunimiillu piniartutut inuussutissarsiuteqarnermiit aalisartutut inuussutissarsiornermut ikaarsaariarnermi qanoq sulisut piginnaanngorsartuarnissaannut atatillugu qulaajaasoqarnissaa suli pisariaqartinneqarpoq.
Naak aningaasat?
Tusagassiuutinut nalunaarummi saniatigut aningaasanik immikkoortitsisoqarsimaneq takuneqarsinnaanngilaq, kisianni illuatungeriit, Hans Enoksen aamma Asii Chemnitz Narup, isumaqatigiissummut isumalluartorujussuupput.