Isumaqatigiissuteqarnikkut Qaanaami sullissineq pitsaanerulersinneqassasoq
Peqqinnissaqarfiup Avannaata Kommuniatalu, Qaanaami innuttaasut pitsaanerusumik sullittarniarlugit, ilaatigut ataatsimut assartuuteqarnissaq neriassanillu tunisassiortarnissaq atsioqatigiissutigaat.
Pisortat Qaanaami innuttaasunik sullissisarnerat pitsaanerulersinneqassaaq, taamaammat Peqqissutsimut Naalakkersuisoq Martha Abelsen (S) aamma Avannaata Kommuniani borgmesteri Palle Jerimiassen (S) suleqatigiinnissamik isumaqatigiissusiorsimapput.
Naalakkersuisut nalunaaruteqarnerminni ilisimatitsiput, pisortat ilaatigut illoqarfimmi assartuinermi nerisassanillu tunisassiornermi ataatsimoorussisoqarsinnaanngorlugu isumaqatigiissut periarfissiisoq.
Tamatuma saniatigut Qaanaami peqqinnissaqarfik utoqqaallu illuat imminnut qanittunnguupput.
- Tamatuma kinguneranik atortorissaarutinik sulisunillu ataatsimut atuisoqarsinnaavoq, tamanut iluaqutaaqisumik, Naalakkersuisut allapput.
- Pisortat suliffeqarfiutaanni akimut suleqatigiinnissaq pisariaqarluinnarpoq innuttaasut nakorsiallu pitsaanerusumik sullinniarlugit. Taamaattumik nuannaarutigaara peqqinnissaqarfiup aamma Avannaata kommunia suleqatigiinnermik aaqqissuussaasumik tunngaviliinermik piviusunngortitsimmata, Martha Abelsen oqarpoq.
Suleqatinik amerlanerusunik avitseqateqartalernissaq
Naalakkersuisut naapertorlugit, isumaqatissuteqarnikkut kommunip peqqinnissaqarfiullu ikiorsiissutinik sungiusarnissamullu atortorissaarutinik assigiinngiiaarnerusunik neqerooruteqarsinnaanissaat innuttaasut nakorsiallu misigissavaat, aamma kommuimi peqqinnissaqarfimmilu sulisut suleqatiik amerlanerusunik avitseqateqarsinnaalissapput.
- Sulisussaqarniarneq tunngaviusumik pingaaruteqarpoq, sulisussaqarniarnerlu Qaanaap inuisa amerlassusaat pissutigalugu killeqarpoq. Taamaattumik assersuutigalugu sulisunik aalajangersimasunik katuussilluni atuinerulernissaq ujartorneqassaaq aamma suliassat Peqqinnissaqarfiup Avannaatalu Kommuniata akunnerminni katuullugit suliarisinnaasassavaat, Naalakkersuisut allapput.
- Pingaaruteqarpoq innuttaasut sulisuttalu peqqinnissaqarfimmik suleqatigiilluarsinaanerat misigissallugu, kiisalu sulisut aqutsisullu illoqarfimminni pissutsinik ilisimasaqarluarlutillu paasisimasaqartut tassaasut suleqatigiinnermut sinaakkutissanik aalajangersaasussat, borgmesteri Palle Jeremiassen oqarpoq.