Isumaqatigiissut: Aningaasarsiatigut assigiinngissitsineq kiisami qaangiuppoq
Kalaallit Nunaanni politiit Danmarkimi suleqatimik aningaasarsiaasa annertoqqataannik aningaasarsiaqartalernissaat, ukiorpassuarni politikkikkut sorsuutigineqareerluni kiisami anguneqarpoq, inatsisinik atuutsitsinermut ministerip folketingimi Kalaallit Nunaannit ilaasortaatitanik marluusunik isumaqatigiissutigisimasaani tamanna takuneqarsinnaavoq.
Siullermik isertitsivinni nakkutilliisut apriilip arfernani isumaqatigiissut malillugu aningaasarsiaat qaffanneqarput. Ullumi Kalaallit Nunaanni politiinut tunngatillugu aningaasarsiatigut isumaqatigiissut inissinneqarpoq.
10,8 millioner koruunit politiit aningaasarsiaannut qaffaassutigineqassapput, Københavnimi suleqatigisamik aningaasarsiaasa annertoqqataannik aningaasarsiaqalissallutik.
Sulisut sulisoriinnarsinnaanerannut iluaqutaassasoq
Neriuutigineqarpoq isumaqatigiissut aqqutigalugu, Kalaallit Nunaanni politiinik sulisussarsiortarneq sulisoqaannarniarnerlu ajornannginnerulissasut.
Inatsisinik atuutsitsinermut ministerip, Nick Hækkerupip, isumaqatigiissut Kalaallit Nunaanni politiit sulinerannut nersornaataasoq aamma "sulisussarsiornermi siunissami pitsaanerulersitsissasoq" naammagisimaarpaa.
IA-meersup Aaja Che,nitz Larsenip nuannaarutigaa, aningaasarsiat qaffaassutissaat 2020-mi januaarip aallaqqaataanit atuuttussanngorlugit isumaqatigiissutitigut qulakkeerneqarsimanera. Tamanna ukiorpassuarni sorsuutigisimavaa, tusagassiorfinnut nalunaaruteqarnermi oqarneratut, "sivisuallaamik" sorsuutigineqarsimasoq.
Aki-Matilda Høegh-Damip ilisimatitsissutigaa, Siumumit "Kalaallit Nunaanni politiit pillugit naligninnaasumik isumaqatiginninniarnernut malinnaalluartoqarniartoq, politiimmi sulinerani atugassarititaasut arlallit Danmarkimi suleqataannit suli ajornerusumik inissisimammata - sumi inunngorsimaneq kisiat pissutigalugu.”
Isumaqatigiissummi immikkuualuttut
Kalaallit Nunaanni politiit aningaasarsiaannut ukiumut 2,5 millioner koruunit tapiliunneqartarput, tunngaviusumik aningaasarsiat assigiinngissutaannut nalimmassaatitut. Taakku saniatigut ukiumut 200.000 koruunit aningaasarsianut pitsanngorsaatissatut immikkoortinneqartarput. Isumaqatigiissut sulisut kattuffii imaqatigiissuteqarfigalugit atuutsinneqalissaaq.