Skip to main content

Isumaqatigiissut: 38 millioner koruunit isertitsivinni sulisut aningaasarsiassaannut immikkoortinneqartut

Danmarkimi inatsisinik atuutsitsinermut ministerip Kalaallillu Nunaannit folketingimi ilaasortaatitat, nunami maani isertitsivinni sulisut aningaasarsiaasa qaffaassutissaat isumaqatigiissutigisimavaat.

Danmarkimi inatsisinik atuutsitsinermut ministeeriaqarfiup siusinnerusukkut allakkiaani takuneqarsinnaavoq, Danmarkimi parnaarussivinni sulisut Kalaallillu Nunaanni isertitsivinni sulisut aningaasarsiaat assigiinngitsupilussuusut.

Aningaasarsiat nikingassutaat maanna iliuuseqarfiginiarneqalerput, 38,4 millioner koruunimmi ukiuni sisamani siunertamut atugassat immikkoortinneqarsimapput. Tamannami inatsisinik atuutsitsinermut ministerip Nick Hækkeruppip aamma Kalaallit Nunaannit folketingimut ilaasortaatitat Aki-Mathilda Høegh-Damip, Siumut aamma Aaja Chemnitz Larsenip, Inuit Ataqatigiit isumaqatigiissutigisimavaat.

- Isumaqatigiissut aqqutigalugu qulakkeerneqarpoq, Kalaallit Nunaanni isertitsivinni sulisut, Danmarkimi illoqarfiit pingaarnersaanni suleqatimik tunngaviusumik aningaasarsiaasa annertoqqataannik pissarsisarnissaat. Peqatigitillugu isumaqatigiissut aqqutigalugu, Kalaallit Nunaanni sulisusarsiortarneq aamma sulisunik attassiinnarniarneq pitsanngorsarneqassapput, tusagassiorfinnut nalunaaruteqarnermi paasissutissiissutigineqarpoq.

Danmarkimi aningaasanut inatsimmi 2020-miit 2023-mut inatsisinik atuutsitsinermut tunngasut pitsanngorsaaffigineqarnissaanut immikkoortitanit 49,2 millioner koruuniusunit anigaasat taakku aaneqassapput.

Immikkoortitanit sinneruttut nunami maani politiit aningaasarsiaannut ilassutitut atorneqassapput. Tassani aamma danskit kalaallillu politiivisa aningaasarsiatigut assigiinngitsumik inissisimanerat ukiorpassuarni oqaluuserineqartarsimavoq.

Folketingimi ilaasortat nuannaartut

Folketingimi ilaasortat marluk isumaqatigiissummik iluarisimaarinnipput:

- Naalagaaffiup Kalaallit Nunaanni akisussaaffimminik qimarratiginnikkunnaarnissaa qineqqusaarutigaara; tassanilu Kalaallit Nunaanni isertitsvinni sulisut allatut pineqarnerat salliutissimallugu. Taamaammat Danmarkimi naalakkersuisut tusarnaarsimanerat nuannaarutigaara, piffissamilu sivisuumi isumaqatiginninniareerluta aningaasarsiat qaffanneqarnissaat qulakkeerparput, Aki-Matilda Høegh-Dam oqarpoq.

- Piffissami ajornartorsiorfiusumi nutaarsiassatsilaat nuannertarput, nuannaarutigaaralu sivisuallaamik isumaqatiginninniareerluta, isertitsivinni sulisut pisariaqartilluinnagaannik aningaasarsiatigut qaffaassutissaannik qulakkeerinnissimanerput, Aaja Chemnitz Larsen oqarpoq.

Sulisussarsiortarnerup ajornannginnerulernissaa naatsorsuutigineqartoq

Inatsisinik atuutsitsinermut ministerip Nick Hækkerupip naatsorsuutigaa, Kalaallit Nunaanni Pinerluuteqarsimasunik Isumaginnittoqarfik ajornannginnerusumik sulisussarsiorsinnaanngussasoq:

- Naalakkersuisut isumaqatigiissummut tapiliussaqarnikkut, Kalaallit Nunaanni Pinerluuteqarsimasunik Isumaginnittoqarfiup sulissanik piukkunnaatilinnik sulisussarsiornermini sulisunillu attassiniarnermini annertuunik unammilligassaqarsimasup, sulisoqarniarnikkut inissisimanerata pitsanngorsaavigineqarnissaanut iliuuseqarput, Hækkerup oqarpoq.

Maanna aningaasat qanoq atorneqassanersut sulisut kattuffiinut isumaqatiginninniutigineqassapput. Isumaqatigiissummili allassimavoq, aningaasat isertitsvinni sulisut ullumikkut aningaasarsiarisartagaannut ilassuitut atorneqarnissaat isumaqatigiissutaasoq. Aningaasarsianut ilassutit 2020-mi jnauaarip aallaqqaataanit atuutsinneqalerput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER