Isumaqatigiissut ullumi atsiorneqassaaq
Naalakkersuisut siulittaasuat Kim Kielsen annertuumik isornartorsiorneqaraluartoq aamma Siumumi politikkikkut eqqissiviilliortoqaraluartoq, mittarfiliortiternissat pillugit isumaqatigiissut Munck Gruppenip aamma Kalaallit Airportsip ullumi atsiussavaat.
Mittarfiliortiternissat pillugit isumaqatigiissut Munck Gruppenip aamma Kalaallit Airportsip qallunaat nalunaaqutaat malillugu ualimut atsiussavaat. Kalaallit Airportsimi siulittaasup, Johannus Egholm Hansenip, tamanna Sermitsiaq.AG-mut uppernarsarpaa.
- Ilulissani Nuummilu mittarfiit marluk sanaartorneqarnissaat pillugu isumaqatigiissut Munck Gruppenip aamma Kalaallit Airportsimi pisortat ullumi atsiussavaat.
Atsioqatigiinneq – inunnit amerlanernit – ilisimaneqanngitsumi Københavnimi pissaaq, tusagassiorfiit aamma peqataasinnaanngillat, Johannus Egholm Hansen, taama ilisimatitsivoq.
Siumumi siulittaasutut atorfik pillugu politikkikkut eqqissiviilliortoqarnerata nalaani isumaqatigiissuteqartoqassaaq. Munk Gruppenimik isumaqatigiissuteqarnissap unitsinneqarnissaa, Aningaasaqarnermut Akileraartarnermullu Ataatsimiititaliami amerlanerussuteqartut piumasaraat. Tamatuma saniatigut Siumumi Inatsisartunut ilaasortanit quliusunit arfinillit aamma Naalakkersuisunut ilaasortap Hermann Berthelsenip, siulittaasumut Kim Kielsenimut tatiginnikkunnaarnertik nalunaarutigaat, Naalakkersuisunilu siulittaasutut tunuarnissaa piumasaralugu.
- Ingerlateqatigiiffiit pillugit inatsit malillugu isumaqatigiissut atsiussavarput, Johannus Egholm Hansen, politikkikkut eqqissiviilliortoqarnerata atsioqatigiinneq sunniuteqarfigissaneraa pillugu apeqqummut naatsumik taama akissuteqarpoq.