isumaqatigiissut
Isumaqatigiissut oqaluttuarisaanermut ilannguttoq
Oqaluttuarisaanermi siullerpaamik qatserisartut akissaatitigut isumaqatigiissuteqarput
- Piffissami sivitsortumi isumaqatigiissuteqalernissamut suliaq kiisami naammassigallartoq.
Qatserisartut peqatigiiffianni KaNuQaPe-mi siulittaasoq Poul Olsen oqarpoq.
Maannakkulli isumaqatigiittoqarsimalerpoq, tamannalu nuannaarutigineqarpoq.
Qatserisartut ukiuni sisamani atuuttussamik isumaatigiissuteqarput. Ukiuni sisamani akissaatitigut qaffariaataasut katillugit 21,4 procent missaaniittut Poul Olsenip naammagisimaarpai, naak illoqarfimmi sumi najugaqarneq aallaavigalugu akissaasersuineq ukiuni sisamani isumaqatigiissuteqarfiusumi attorneqanngikkaluartut Poul Olsen isumalluarpoq isumaqatigiinniaqqinnissami tamakku iluuseqarfigineqassasut, ilinniagarmi assigiik assigiimmik akissaasersorneqartariaqartoq Poul Olsenip pingaartillugu erseqqissaatigaa.
Poul Olsenittaaq oqaatigaa qatserisartut soraarnerusutisiassaminnik katersisinnaalernerat pingaaruteqarluinnartoq.
- Qatserisartut aaqqissuussaasumik ingerlalermatali qulaaninngaannit naalakkiutaasutullusooq isikkulimmik akissaasersuineq maanna qimanneqarmat nuannaarutissaavoq annertooq, qatserisartullu isumaqatigiissutitigut illersorneqalernerat alloriarnerusoq annertooq, Poul Olsen oqarpoq.