Isumaqatigiissut nutaaq: Tuukkaq iganermut uuliamik atornikumik orsussaqarluni timmisassaaq

Orsussaq uumassusillit igitassartaannik suliaasoq – iganermut uuliat atornikoq ilanngullugu, sisamanngornermit Air Greenlandip timmisartorsuanit nutaamit Tuukkamit orsussarineqartalissaaq.

Air Greenlandip aamma DCC & Shell Aviation Denmarkip akornanni nutaamik isumaqatigiissusiortoqarnerata kinguneranik tamanna pissaaq, Air Greenland tusagassiuutinut nalunaarummi taama ilisimatitsivoq.

Orsussaq uumassusillit igitassartaanneersoq 'sustainable aviation fuel'-itut (SAF) nassuiarneqarpoq, taannalu atuinerup 5 procenterissavaa.

Orsussamik atuinerup annikillisinneratigut taamaaliornikkullu CO2-mik aniatitsinerup annikillisinneratigut, Kalaallit Nunaata nungusaataanngitsumik atuiffiusutut tikitassanngornissaanik ingerlatseqatigiiffiup kissaataanik isumaqatigiissummik naammasserusuppaa, Air Greenlandimi siulersuisunut siulittaasoq, Bodil Marie Damgaard oqarpoq:

Pisortaq: Air Greenland siuttunngussaaq

- Silaannakkut angallassinermi pinngortitap tunniussinnaasaanik atuinissaq Air Greenlandip kulturiani aammalu ingerlatsinerup nungusaataanngitsumik tunngaveqarnissaa pimoorunneqartuarpoq, tamannalu Atlantikoq qulaallugu timmisartorsuatta A330neo-mik taarserneqarneranut pissutaarpiartut ilagaat, Air Greenlandimi siulersuisunut siulittaasoq oqarpoq.

Air Greenland naapertorlugu orsussap uumassusillit igitassartaanneersup 5 procentit, Europami ingerlatseqatigiiffinni atorneqartumit annertuneruvoq, pisortaaneq Jacob Nitter Sørensen oqarpoq:

- Atlantikoq qulaallugu timmisartorsuartaatsinnik orsussamik atuinerput annikillisipparput, taamatullu Tuukkap ingerlaarnerisa 5 procentiini SAF-imik atuinissaq pisussaaffigileratsigu, CO2-mik aniatitsinerput suli annikinnerulissaaq. Air Greenlandillu taamatut isumaqatigiissusiornermigut Europami silaannakkut angallassisartuni nungusaataanngitsumik atuisunut siuttunut akuulernera tullussimaarutigaara, taanna oqarpoq.

Københavns Lufthavnimi ingerlatseqatigiiffinni siulleq – akinut sunniuteqassanngitsoq

Orsussap immikkuullarissup pisiarineqartarnerata aningaasartuutit amerlisissanerai, taamaalillunilu billetit akiinik tatisaqassanersoq, Air Greenlandip tusagassiuutinut nalunaarummini ilisimatitsissutiginngilaa. Ingerlatseqatigiiffiup suliniutip billetinut sunniuteqannginnissaa 'toqqarsimagaa', Jacob Nitter Sørensen Sermitsiaq.AG-mut allagaqarluni akissuteqarnermini oqaaseqarpoq:

- Suliniutip matuma billetit akiinut sunniuteqannginnissaa aalajangiupparput, siunissamullu aningaasaliinertut taanna isigaarput, tassa avatangiisinut tunngasunik iliuuseqarnikkut aamma peqatigisaanik Kalaallit Nunaata tikinnissaata pilerinarsarneratigut, taamaalillutalu atuisunik amerlanerusunik soqutiginnilersitsilluta, Jacob Nitter Sørensen akivoq.

Air Greenland ingerlatseqatigiiffinni Københavns Lufthavnimi orsussamik SAF-imik mittarfimmut pissarsisartuni siulliussaaq.

DCC & Shell Aviation Danmarkimi pisortap oqarnera naapertorlugu alloriarneq annertusoq, nunat tamalaat aamma eqqarsaatigalugit:

- EU-milu anguniagaasoq 2025-mi Europami timmisartortitseqatigiit orsussamik atugaasa minnerpaamik 2 procentia SAF-unissaa eqqarsaatigalugu, Air Greenlandilu massakkut annertuumik alloriarpugut, DCC & Shell Aviation Danmarkimi pisortaaneq Ulrik V. Brendstrup oqarpoq.