Isumaqatigiinniarnerit ajornakusoortut: Nipisanniarneq kinguaattoortinneqaqqittoq
Nipisanniarneq aasiit suli aallartissinnaanngilaq, KNAPK aamma Royal Greenland tunisinermi aki suli isumaqatigiissutiginngimmatigit. Sunngiffimmi aalisartut aamma nipisanniarnerminnik aallartitsissanngillat.
Siorna Royal Greenlandip aamma aalisartut piniartullu kattuffiata KNAPK-p akornanni isumaqatigiinnaveernerat pissutigalugu nipisanniarneq ullunik 18-inik kinguaattoorpoq.
Illuatungeriit taakku marluk tunisinermi akit isumaqatigiissutigisinnaasimanngilaat, taamaalillunilu aalisarneq aallartissinnaanngilaq. Akerleriinnerlu aamma uteqqinneqarpasilerpoq.
Aalisartut peqatigiiffii, kattuffii aamma tunitsiviit aalisarnerup ammarneqarnissaanut isumaqatigiissusiorsimanngimmata aalisarneq aallartissinnaanngitsoq, Aalisarnermut Piniarnermullu Naalakkersuisoqarfik tallimanngornermi nalunaaruteqarpoq:
- Taakku aatsaat pisinnaalissapput Naalakkersuisoqarfik nalunaaruteqareerpat. Tamanna aamma sunngiffimmi aalisartunut atuuppoq, naalakkersuisoqarfik allappoq.
RG aamma Naalakkersuisut isornartorsioraat
Tunisinermi akit illuatungeriit aammaarlutik isumaqatigiissutigisinnaanngilaat. KNAPK-mi siulittaasoq Nikkulaat Jeremiassen Royal Greenlandimut Naalakkersuisunullu arlalinnik sakkortuumik oqariartuuteqarpoq.
KNAPK-p naatsumik oqaatigalugu tunisinermut akit qaffasinnerunissaat kissaatigaat, politikerillu Naalakkersuisut aamma Royal Greenland inissittariaqaraat Inatsisartunut piumasaraat, tunisinermilu akinik naleqqunnerusunik qulakkeerinneqqullugit.
Royal Greenland naapertorlugu ingerlatseqatigiiffik akimik nalunaaruteqarsimavoq. Suliffeqarfissuarmi attaveqaqatigiinnermut pisortaq Masaana Egede Sermitsiaq.AG-mut ilisimatitsivoq:
- Pingaarnerit aalajangiusimassavagut, tassa suannik tigusinissamut piareersimavugut, aalisarnerlu aallartikkusupparput.
Kiilumut 22 kr.
- 24. marts kiilumut akimik 22 koruuniusunik tapimillu koruunimik, kiisalu tunitsivigineqarnissamik piareerluta nalunaaruteqarpugut, Masaana Egede oqarpoq.
Royal Greenland 900 tonsinik tuniserusuttoq nangilluni oqaluttuaraa, tamannalu siornarnit 100 tonsit missaannik annertuneruvoq.
Siorna 22 koruunit tapilu koruuni isumaqatigiissutigineqarput, kisianni KNAPK naammagisimaarinnissappat suli amerlanerusariaqarput.