Isumaqatigiinneq: Meeqqat illersuisuata atuuffia sivitsorneqassaaq

Meeqqat illersuisuata toqqarneqarfiata ikiumik ataatsimik sivitsorneqarnissaanik naalakkersuisup Martha Abelsenip siunnersuutaa Inatsisartuni partiinit ataatsimiititaliamiillu tapersersorneqarpoq.

Ullumikkut inatsit malillugu, meeqqat ilersuisuat ukiut pingasukkaarlugit toqqarneqartarpoq. Pineqartoq piffissami ataatsimi toqqarneqaqqissinnaavoq; kisianni ataasiaannarluni. Tassa imaappoq, meeqqat illersuisuat ukiuni arfinilinni annerpaamik atorfeqarsinnaatitaavoq.

Taamaattumik uani siunnersuummi siunertarineqarpoq, Meeqqat illersuisuata toqqarneqarfianik ukiunit pingasunit ukiunut sisamanut sivitsuinissaq kiisalu qasseriarluni Meeqqat illersuisuata toqqagaaqqissinnaaneranut killiliussamik peersinissaq.

Tatiginnilernissaq piffissamik pisariaqartitsivoq

- Innuttaasut akornanni Meeqqat illersuisuannut aamma MIO-mut tatiginninnerup ilisimanninnerullu alliartortinnissaa piffissamik pisariaqartitsisuummat pingaaruteqanngitsuunngilaq. Innuttaasut, pingaartumik meeqqat, inummut aalajangersimasumut MIO attuumassuteqartissinnaammassuk, matumani suliffeqarfimmut taassumalu kimulluunniit attuumassuteqannginneranut ataqqinninnermut nukittorsaataavoq. Aammattaaq kina imminnut sinniisuunersoq aamma piginnaatitaaffitik unioqqutinneqartut ulorianartorsiortinneqartulluunniit misigitillutik sumut saaffiginnissanersut suliffeqarfiup meeqqanut paasinarnerulersissavaa, ilaatigut siunnersuummi atuarneqarsinnaavoq.

Siunnersuut Inatsisartuni pingajussaaneerlugu oqallisigineqassaaq novembarip 14-ani.