Isumaqataannginnertalimmik: Ikiorsiissutit sivitsorneqarput
Naalakkersuisut takornarialerisunut ikiorsiissutit sivitsorneqarnissaannut siunnersuutaat Aningaasaqarnermut Akileraartarnermullu Ataatsimiititaliap akueraa. Ataatsimiititalialli piareersarnermut suliarinninnermullu piffissap atorneqartup sivikinnera isumaqataaffiginngilaa.
Takornarialerisunut ikiorsiissutit pingasut ingerlateqqinneqarput, aallartisaqqinniarnermut ikiorsiissutit atuutilersinneqarput aamma inuussutissarsiortut kodeannik nutaanik, suliffeqarfinnik tapiissuteqarfigineqarsinnaasunut ilanngussisoqarpoq.
Suliffeqarfiillu immikkut ataasiakkaarlutik qanoq annertutigisumik ikiorsiissutinit tapiissuteqarfigineqarsinnaanerannik appariartuaartitsinissamik atuutilersitsisoqarpoq.
Inatsisartut Aningaasaqarnermut Akileraartarnermullu Ataatsimiititaliaata aalajangigaani tamanna atuarneqarsinnaavoq.
Ikiorsiissutit juunip naaneranit qaangiunnissaat sioqqutilaarlugu, sivitsorneqarnissaannik Naalakkersuisut ataatsimiititaliamut qinnuiginnittut, Sermitsiaq.AG-p ippassaq allaaseraa.
Ataatsimiititaliap makku akuerai:
- Takornariartitsinermik inuussutissarsiuteqartunut ajutoornermi ikiorsissutit, inuutissarsiornermi ikiorsiissutit aammalu inuutissarsiortut ingerlatassaannut ikiorsiissutit 1. juli-miit 31. oktobarip tungaanut ingerlaannarnissaat
- inuussutissarsiortut kodeat 47.78.30 Tammaviutsunik sanalukkanillu tuniniaasartut aammalu inuutissarsiortut kodeat 71.12.40 Aatsitassarsiornermi misissuinernut aammalu pilersaarusiornermut, nunamik uuttuinernut il.il. 1. juulimiit ikiorsiissutinut ilanngunneqarnissaat
- ajutoornermi ikiorsiissutini qaammammut annerpaamik 750.000,- dkr-nik 1. juli 2021-miit 31. august ilanngullugu pissarsisoqarsinnaasoq, 1. september-imiit 30. september-ip tungaanut annerpaamik 500.000 dkr-nik pissarsisoqarsinnaasoq kiisalu 1. oktober-imiit 31. otkober-ip tungaanut anerpaamik 300.000,- dkr-nik pissarsisoqarsinnaassalluni
Ataatsimiititaliap ikiorsiissutit akuerai, takornarialerisut nunarsuaq tamakkerlugu tunillaassuuttoqarnerani tapiissuteqarfigineqarnissaat pingaaruteqartoq, ilaasortat isumaqaramik. Tamannalu piffissaq kingulleq atorlugu pivoq, Naalakkersuisut siunnersuutaat ataatsimiititaliap pingasunngornermi qaangiutilerneranni suliarinerat pissutigalugu, tamatumunngalu ataatsimiititaliaq imaq oqarpoq:
- Suliaq ataatsimiititaliap suliarinninnissaa nalunaaquttap akunneri 24-t ataallugit sioqqullugu ataatsimiititaliamit tiguneqarmat. Taamatuttaaq ikiorsiissutinut malittarisassat ataatsimiititaliap ataatsimiinnissaa minutsinik 30-nik sioqqullugu ataatsimiititaliamit tiguneqarput, ataatsimiititaliaq aalajangiinermini taama allappoq.
Suliap ingerlanera ataatsimiititaliap naammaginngilluinnarpaa, Atortussat aallarteqqinnissamut ikiorsiissutinut tunngasut taakkununngalu malittarisassat pisariaqartinneqartutut sukumiitigisumik misissornissaat ataatsimiititaliamit periarfissaqarfigineqarsimannginnera pissutigalugu:
- Ikiorsiissutit atuuttut Naalakkersuisunit namminernit aalajangerneqartumik juulip aallaqqaataani atorunnaartussaasut Naalakkersuisunit ilisimaneqarmat pisariaqartitsineq siumut naatsorsuutigineqareersimasinnaasariaqaraluarpoq. Tamanna akuersaarneqarsinnaanngilaq, siumullu isigisumik iluarsiivigineqarnissaa ataatsimiititaliamit piumasarineqarpoq, ataatsimiititaliap aalajangiinerani tamanna allaqqavoq.
Naak inuussutissarsiornermut naalakkersuisoq?
Aningaasaqarnermut nunamut namminermullu naalakkersuisoq Asii Chemnitz Narup (IA), ataatsimiititaliamut siunnersuummut atsiortuummat, tamatuma saniatigut ataatsimiititaliap tupigusuutigaa,
Inuussutissarsiornermut, niuernermut, nunanut allanut silap pissusianullu naalakkersuisup Pele Brobergip (N) sooq atsiortuunnginnersoq, taassumami ikiorsiissutit assigiinngitsut aquttussaammagit, ataatsimiititaliaq apeqquteqarpoq.
Piffissakinneq pissutigalugu ataatsimiititaliap Naalakkersuisunit inassuteqaatit marluk akueriniarnagit aalajangerpoq. Ataatsimiititaliap immikkoortut aggustip sisamaanni ataatsimiinnermi suliarinissaat neqeroorutigaat.
Ataatsimiititaliap makku akuerinngilai:
- 1. november 2021-imiit 31. december 2021 tungaanut aallarnisaqqinniarnermut ikiorsiissutit atuutinneqarnissaat taakkununngalu najoqqutassat ilanngullugit. Takornarialerinermi inuutissarsiuteqarnermut ajutoornermi ikiorsiissutit aammalu aallartisaanermut tapiissuteqarnerit imiarisamikkut assigiipput taamaattorli qaammammut annerpaamik 100.000,- dkr-nit tikillugit pissarsisoqarsinnaalluni
- Nunanut Allanut, Inuussutissarsiornermut, Niuernermut, Silallu Pissusaanut Naalakkersuisoq takornariartitsinermik inuussutissarsiuteqartunut aallartisaqqinniarnermut ikiorsiissutinut malittarisassani allassimasunik aaqqiissuteqarsinnaassasoq.