ajunaarnersuaq
- Isumaqarlunga toqulerlunga
25-nik ukiulik Ivik Cortzen tassaarsuarmit anigueqqarpoq
Ivik Cortzenip inimi mobiilerujoortilluni ajorluinnartumik pisoqartoq paasivaa.
Taassuma aappaa arsariarsimavoq, sivitsunngitsoq aapparmi angutaa ernerminut nakkartoqarsimanerarlugu nilliasoq tusaavaa.
- Immamut qiviarama imaq aalasorujussuuvoq, quillu ilai angoreersimagai. Mallit aappassaanik takkummata illut angugai takusinnaavara, tassanilu ersiummerujussuarpunga. Nipitoorujussuuvoq, illulu sajulertoq malugisinnaavara. Imaq pingajussaanik ulimmat anillunga arpalerpunga, kisianni kavaajara qimassimagakku uterlunga aavara.
- Anillaqqikkama majuartarfiit nusutsereersimasut, qujanartumik sikuminermut qisunnullu tummarsinnaagama, taamaalillunga nunamut pissippunga qaqqamullu arpallunga, 25-nik ukiulik Ivik Cortzen oqaluttuarpoq.
Illumit anilluni arpannermi kingorna, aappaata angutaa isumaqarsimavoq qaliani sinittoq, arpalluni alakkaramiuk ingerlareersimasoq.
- Aneqqikkami imaq ulereersimasoq, kisianni imminut annappoq. Angutaatima angallatini annaanniarlugu ornippaa, kisianni pituutaa peersinnaasimanngilaa. Tassanngaannaq eqqumiitsumik nassuiarsinnaanngisaanik pisoqarpoq, tassami tassanngaannaq savimmik qangarnisamik manngertornersimasumik tigummiaqaleriasaarpoq, taamaalillunilu allunaasaq kiperiarlugu avalappoq.
- Takuara avalattoq, qujanartumik annappoq, Ivik Cortzen suli tupaqqasoq oqaluttuarpoq.
Tunniutiinnangajattoq
Taanna tamaviaarluni qaqqamut arpappoq, tunumut qiviarnissani saperlugu, kisianni allat tamarmik aamma qummut arpattut takuai.
- Taamak sukkatigisumik arpannissara sapingajappara, arlaleriarlunga tunniutiinnangajappunga, taamaammat toqulersorigaluarpunga.
Uterusunngitsoq
Ivik Cortzen nunaqarfimmut uterusunngilaq.
- Uteqqissaguma toqqissisimasinnaannginnama uterusunngilanga. Ersiinnavissagaluarpunga. Illorput amuneqartoq annaavarput, pigisagullu tamangajaasa annaavagut. Umiatsiarput suli pigaarput, taanna suli Nuugaatsiamiippoq. Aapparma pitulluarsimagamiuk, politiillu tassaniinnerminni atorpaat.
- Atorsinnaasimagamikku aappara kingorna qujaffigaat. Ajoqusilaarsimavoq, kisianni ajunngilaq, Ivik Cortzen oqarpoq, taassuma piffissami qaninnermi qanoq pisoqassanersoq naluaa.