Isumalluuteqarnani kiffaanngissuseqarneq
Danmarkip avissaarnerup kingorna Kalaallit Nunaannut aningaasaqarnikkut ikiuunnissaa naatsorsuutigineqarsinnaanngilluinnarpoq. – Namminiilivinnissap Kaasarip Atisartaavisut pissuseqalinnginnissaa pingaaruteqarpoq, politikeri saqqummiunneqartumut oqarpoq.
Ministeriunerusimasoq Poul Nyrup Rasmussen (S) Savalimmiunut atatillugu siullermik nalunaarsimavoq, avissaarnissamik suliniuteqarpata, Danmarkip ukiut sisamat qaangiunneranni ataatsimoortumik tapiissuteqartarnini unitsissagaa. Kingorna taamani ministeriunerusimasup Lars Løkke Rasmussenip (V) uteqqillugu oqaatigaa, Kalaallit Nunaata namminiilivinnermi kingorna tapiissuteqarfigineqarnissani neriuutigissanngikkaa.
Maannalu Socialdemokratit Danmarkimi naalakkersuisuutitaqartut tamanna aamma erseqqissarpaat. Pele Brobergip maanna nunanut allanut naalakkersuisuuffimmit tunuartitaasup tunngavilersuutigisaasa, Danmarkip inatsisit inuiannut tamanut atuuttut tunngavigalugit tapiissuteqartuarnissamut pisussaaffeqarneranik, akerlerluinnaannik, nunanut allanut ministeri Jeppe Kofod IA-meersumut Aaja Chemnitz Larsenimut akissutimini allappoq, taamatut saqqummiussineq kukkusuusoq.
Aaja Chemnitz Larsenip paasitinneqarnini naammagisimaartorujussuuaa.
– Paasitinneqarsimaneq tunngavigalugu tamanna oqallisigisariaqarparput. Inatsisartunut qineqqusaartoqarnerani oqaatigineqarpoq, pituttugaanngitsumik suleqateqarneq free association toqqarutsigu Danmark suli ukiuni 20-nit 25-nut ataatsimut tapiissutinik akiliuteqartassasoq. Tamanna ilumuunngitsoq maanna maluginiarsinnaavara. Danmark inatsisit inuiannut tamanut atuuttut pisussaaffeqanngilaq, oqarpoq.
Allaaserisaq tamaat uani AG-mi atuaruk: