Skip to main content

Isumalluaqisut: Soorlu Aasivissiorluni

SIK-p innuttaasunik ataatsimiititsinerani Qassimiuaarnermi peqataasut ilai Sermitsiaq.AG-p oqaloqatigai

Innuttaasut ataatsimiinnerat Qassimiuaarneq, sulinermik inuussutissarsiutillit kattuffiata SIK-p aaqqissuussaa, aallartippoq.

Ataasimiinneq ingerlanneqarpoq Nuummi meeqqat atuarfiata Ukaliussap eqqaani Nuuk Playgroundimi.

Sermitsiaq.AG-p peqataasut ilai oqaloqatigai aperalugillu innuttaasut ataatsimiinnerannut suut naatsorsuutigineraat.

Oqallinnerit arlallit

Inatsisartunut ilaasortap Michael Rosingip (D) ataatsimiinneq inunnik amerlasuunik naapitsinissamut periarfissatut isigaa.

– Inuit kattuffinnit assigiinngitsuneersut ataatsimiinnermi peqataapput, aammalu inuinnaat, oqaloqatiginissaanik immaqa pisariaqartissinnaasakka, taanna oqarpoq.

Partii Naleqqameersup Per Rosing-Petersenip aaqqissuussaq iluarinarteqaa.

– Partiimit neriuppugut innuttaasut ataatsimiinneranni oqallinnerit pitsaasut arlallit ingerlanneqarumaartut. Uggornarporli sila atoruminarpallaanngimmat. Immaqa pitsaanerussagaluarpoq aaqqissuussineq illup iluanut nuukkaanni.

Inuussutissarsiutinik ineriartortitsineq

KNAPK-p pisortaata Petrus Biilmannip neriuutigaa Kalaallit Nunaanni inuussutissarsiutit ineriartortinneranni SIK peqataajumassasoq.

– Piffissanngorpoq inuussutissarsiutit ineriartortinneranni aamma SIK-p peqataalernissaa. Neriuppugut ataatsimiinnermi matumani paasineqassasoq aalisarneq Kalaallit Nunaannut qanoq pingaaruteqartigisoq, tassami taanna inuussutissarsiutitta pingaarnersaraat.

Inuit Ataqatigiit siulittaasuata Sara Olsvigip SIK-p suliniutaa nuannaarutigaa.

– Aasivimmut, kalaallit aasaanerani naapisimaartarnerannut assingusorpassuaqarpoq, nuannaarutigaarpullu kattuffiit assigiinngitsut amerlasuut peqataanissaannut qaaqquneqarsimammata.

Nunanit allanit misilittakkat

Inatsisartunut ilaasortap Jens-Erik Kirkegaardip ataatsimiinneq isigaa siunissamut pilersaarutit oqaluuserinissaannut periarfissatsialattut.

– Aamma uagut nuannaarutigaarput Qassimiuaarnermi matumani inuit naapissinnaagatsigit. Ataatsimiinnermi oqaluuserisassarpassuaqarpoq soqutiginartunik, tamakkualu qilanaaraakka.

SIK-p siulittaasuata Jess G. Berthelsenip innuttaasut ataatsimiinnerat pitsaasumik katersuuffittut isigaa.

– Matumanimi inuiaqatigiit ingerlaneranni pingaarutillit peqataapput. Innuttaasut ataatsimiinneranni pingaarutiippassuit oqaluuserineqassapput, innuttaasut namminneq peqataaffigisinnaasaat.

– Aamma nunanit allanit peqataasoqarpoq, tamakkualu misilittakkatik eqqartussavaat, neriuppungalu tamakkua iluaqutigisinnaassallutigit. Tamannami pitsaanerusunik sinaakkutaqartitsilissaaq, taamaasilluni suliffissaaleqisut ikilisinneqassallutik.

Innuttaasut ataatsimiinnerat sisamanngorpat naassaaq.

Video ataani takujuk

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER