Isumaliutissiissut: Naalakkersuisut akuersissutinik suliaqartariaqanngikkaluarput

Nunami maani aalisarsinnaanermut akuersissutinik qanoq tunniussisoqartarsimanera ulluni kingullerni oqallisaasimaqaaq.

Oqallittoqarnerani qitiusoq tassaavoq, aalisarsinnaanermut akuersissummik pissarserusukkaanni naalakkersuisumut toqqaannartumik sianertoqartarsimanera sulilu tunngaviatigut sianertoqarsinnaanera.

Aalisarnermut maanna naalakkersuisuusup Aqqaluaq B. Egedep tamanna ileqquusimasutut oqaatigisimavaa, taamaattoqartarsimasorlu Aalisarnermut Piniarnermullu Naalakkersuisoqarfimmi atorfilittanit uppernarsarneqarsimalluni.

Naalakkersuisoqarfik naapertorlugu, aalisarsinnaanermut akuersissummik taamatut qinnuteqartoqaraangat atorfilittat suliassaq ingerlaannartumik naalakkersuisumit tigusarsimavaat, aalisarsinnaanermulli akuersissummik qinnuteqaatit suli naalakkersuisoqarfimmi suliarineqartarput.

Naalakkersuinikkut akuleruttoqannginnissaa qulakkeerneqanngitsoq

Periutsillu taassuma aqutsinermi politikkikkut akuliutinnginnissamut tunngavik qulakkiinngilaa. Aalisarneq pillugu Ataatsimiititaliarsuup isumaliutissiissummini siorna aasakkut saqqummiunneqartumi inerniliuppaa.

Ataatsimiititaliarsuarmit inassuteqaatit:

Aalisarneq pillugu Ataatsimiititaliarsuup innersuussutigaa makkua aalisarneq pillugu inatsimmut tapiliunneqassasut:

- Aalisarneq pillugu aqutsivimmi tunngavissamik aqutsinermi politikkikkut akuliuttussaannginnermik tunngavimmik atulersitsisoqassasoq/inerisaasoqassasoq,

- Aalisarneq pillugu inatsisissami Naalakkersuisut ataanni akuersissutinut immikkut aqutsisoqarfimmik pilersitsisoqassasoq, suliassaanik pisinnaatitaaffiinillu inatsimmi ersarissumik maleruagassalimmik, soorlu tamanna isumaliutissiissummi taaneqareersoq, aamma

- Maalaartarfimmik pilersitsisoqassasoq.

SQAPK-mit aallartitaasoq ikinnerussuteqarluni aqutsinermi politikkikkut akuliutinnginnissamik tunngavik isumaqatiginngilaa.

Pissarsiffik: Aalisarneq pillugu Ataatsimiititaliarsuup isumaliutissiissutaa

Assigiinngissitsisinnaanerup pinngitsoortinneqarnissaa aamma assersuutigalugu innuttaasut inuussutissarsiuteqartullu ilaat salliutillugit aalisarsinnaanermut akuersissummik tunniussisoqartannginnissaa pineqartillugit aqutsinermi naalakkersuinikkut akuliuttoqartarnera tulluartuunngilaq.

Taamaammat ataatsimiititaliarsuarmit siunnersuutigineqarpoq, akuersissutinut aqutsisoqarfimmik pilersitsoqasssasoq, akuersissutinik pissarsiniarluni qinnuteqaatinik Naalakkersuisut sullissisarunnaartillugit:

- Politikkikkut akuliutinnginnissamik tunngaviup atulersinneqarnissaanut naleqqunnerpaaq tassaavoq aalisarnerup sinaakkutaata inatsisitigut aalajangersarneqarnissaa, inatsimmilu aalajangiisinnaassutsip ilamininnguanik taamaallaat Naalakkersuisunut tunniussisoqarluni.

- Suliakkiisoqarpallu tamanna tamakkiisumik najoqqutassanik aalajangersaanermut tunngassuteqassaaq sulianik aalajangersimasunik suliaqarnermut tunngassuteqaratik, ataatsimiititaliarsuaq nalunaarusiamini allappoq.

Aqutsinermi naalakkersuinikkut akuliuttoqartannginnissaa tapersersorluarneqartoq

Ataatsimiititaliarsuq naapertorlugu akuersissutinut aqutsisoqarfeqarnikkut qulakkeerneqassaaq "tunngaviit najoqqutassiallu politikkikkut aalajangerneqartut illuatungaanilu taakkunannga allaffissornikkut aqutsineq ersarissumik immikkoortinneqarnissaat."

Ataatsimiititaliarsumi maanna atorunnaarsinneqarsimasumi siulittaasumut tulliusimasup Peder Andersenip Sermitsiaq.AG-mut oqaatigaa, Aalisarneq pillugu Ataatsimiititaliarsuarmi ilaasortat akornanni aqutsinermi naalakkersuinikkut akuliuttoqartannginnissaa tapersersorluarneqartoq.

Tamanna isumaliutissiissummi aamma allassimavoq. Naalakkersuinikkut akuliuttoqartannginnissaa aamma akuersissutinut aqutsisoqarfik pillugit immikkoortumi allassimavoq, sineriammut qanittumi qaleralinniat peqatigiiffiannit SQAPK-mit taamaallaat tamanna isumaqatigineqanngitsoq, peqatigiiffimmillu ikinnerussuteqarluni oqaaseqaatigineqartoq ilanngunneqarsimalluni:

- SQAPK-mit aallartitaasoq ikinnerussuteqarluni aqutsinermi politikkikkut akuliutinnginnissamik tunngavik isumaqatiginngilaa, isumaliutissiissummi allassimavoq.

Ataatsimiititaliarsuaq naapertorlugu, akuersissutinut aqutsisoqarfimmik pilersitsinikkut aqutsinermi naalakkersuinikkut akuleruttoqannginnissaa qulakkeerneqaannarani aammali nungusaataannginnerusumik atuinissaq qulakkeerneqassaaq.