Isumalioqatigiissitat aningaasaqarnikkut tukattuliornerat pillugu partiit: Kusanaatsuliorneq, pinnguarfik aamma pisariaqanngitsumik agguaaffiusoq
Tunngaviusumik inatsisissaq pillugu Isumalioqatigiissitat aningaasanik atuinerat pillugu isornartorsiuinerit kukkunersiuinermit nalunaarusiami saqqummiunneqartut, Múte B. Egedep oqaaseqarfigerusunngilai. Partiini siulittaasut allat akerlianik oqaaseqarput.
Tunngaviusumik inatsisissaq pillugu Isumalioqatigiissitat nunatta tunngaviusumik inatsisissaanik missiliummik suliaqarnerminni 30 millioninik atuisimanerannik kukkunersiuisut misissuinerannit saqqummiunneqartut, partiini siulittaasut arlallit narrutsaatigaat.
Naalakkersuisulli siulittaasuat Múte B. Egede, misissuineq pillugu oqaaseqarusunngilaq. Allatsini aqqutigalugu allagaqarluni ima akissuteqarpoq:
- Naalakkersuisut siulittaasuat Múte B. Egede Tunngaviusumik inatsisissaq pillugu Isumalioqatigiissitat isumaliutissiissutaanut tunngasumik apersorneqarsinnaavoq, kisianni kukkunersiuisut misissuinerat pillugu oqaaseqarusunngilaq, isumalioqatigiissitat iluanni aningaasat atorneqartut pineqarmata.
Tunngaviusumik inatsisissaq pillugu Isumalioqatigiissitat siulittaasuata suliaq pillugu oqaaseqarnissani itigartitsissutigereerpaa. Politikerinit akisussaasunit Sermitsiaq.AG oqaaseqartitsiniarluni suli sulissuteqarpoq.
Suut tamaasa saqqummiunniartigit
Siumumi siulittaasoq, Erik Jensen, IA-mik naalakkersuisoqateqartoq aamma annerusumik oqaasissaqanngilaq, kukkunersiuisut misissuinerat 13. oktobarimi ullulerneqarsimasoq suli pisimannginnamiuk.
- Siumumi kukkunersiuinermit nalunaarusiap imarisai suli oqallisigineqanngillat, kisianni soorunami kukkunersiuisartut EY Kalaallit Nunaata isornartunik maluginiagassaqarneranik isumaqarnera pimoorullugu suliaq tiguarput.
Alla akerlianik oqaasissaqarluinnartoq tassaavoq, Demokraatit siulittaasuat Jens-Frederik Nielsen, taassuma arlaleriarluni isumalioqatigiissitat aningaasaqarnerat pillugu § 37 naapertorlugu apeqquteqaatitigut paasiniaaffigisimavaa, kisianni iluatsitsivallaarsimanngilaq.
- Nalunaarusiami allassimasut kusanaatsuliornerupput, maanna kisitsisit tamarmiusut saqqummiunneqartariaqarput. Aningaasat akileraarutigineqartut sunut atorneqarsimaneri innuttaasut paasinninnissamut pisinnaatitaaffeqarput.
Taanna siorna novembarimi aningaasat qanoq amerlatigisut Tunngaviusumik inatsissaq pillugu Isumalioqatigiissitani ilaasortanut politikkikkut toqqakkanut atprneqarsimanersut, § 37 naapertorlugu apeqqutigaa, akissarsianut, nerisaqarnermut, angalanermut aningaasartuutinut, aamma unnuinermut aningaasartuutit allallu ilanngullugit.
Nalunaarusiaq oktobarimili piareertoq
Qaammatit pingasut qaangiuttut februaarimi Naalakkersuisut siulittaasuat Múte B. Egede (IA) akissuteqarpoq, tassani naatsorsuinerit nammineq suliaralugit piffissarujussuaq atorneqartariaqarnerarpaa, apeqqullu taamaammat akineqarsinnaannginnerarlugu. EY-p kukkunersiuilluni nalunaarusiaata piareerneranit qaammatit sisamat qaangiuttut akissuteqarneq pivoq.
Kukkunersiuisut misissuinerisa inernera pillugu Jens-Frederik Nielsen suli ilisimatinneqarsimanngilaq, Sermitsiaq.AG-p allaaserisaa taamaallaat paasisaqarfigaa, tassanilu aamma akissarsiaqartitsinerit pillugit allakkamik naalakkersuisoqarfiup tunniukkumanngisaanik allagaqartoq atuarneqarsinnaavoq.
- Tamaasa takutiinnarsigit. Naalakkersuisunit matoqqaniarnersuaq takusartagarput attanneqarsinnaanngilaq.
Akissussaaffik naalakkersuinermiittoq, Jens-Frederik Nielsen oqarpoq.
- Akisussaaffik Naalakkersuisut siulittaasuanniippoq. Suliaq una iluamik suliarineqanngilaq, tamannalu pakatsinarpoq.
Aningaasaqarnikkut pinnguarfik agguaaffillu
Pele Brobergip suliap ingerlanneqarnera tamaat isornartorsiorpaa, ilaasortallu politikkikkut toqqarneqartut tassani pissutaaqataalluinnartut isumaqarpoq.
- Isumalioqatigiissitat aningaasannanniartitsilluni pilersinneqarsimasoq inuit isumaqarpata, taava katersiffissarujussuussaaq. Taamaattoqarsimaneranik isikkoqarpoq. Tunngaviusumik inatsisissamut missiliummik suliassaq ilisimasalinnit suliarineqartussaasimagaluartoq uteqqissinnaavara.
Atassummi siulittaasoq, Aqqalu Jerimiassen tupaallaateqanngilaq.
- Sivisuumik tamanna oqaatigisareerparput. Takorluugaq kusanartoq, namminersulivinnissamut aqqutissatut politikkikkut iluareqqusaarnermut atorneqartoq, piviusumik aningaasaqarnikkut pinnguarfiusoq. Aningaasat taakku peqqinnissaqarfimmut atorneqartussaagaluarput.