Skip to main content

Isumalioqatigiissitaq: Aatsitassarsiornermi peqatigiit Kalaallit Nunaannik suleqatissarsiussasut

Tuluit Nunaanni isumalioqatigiissitap kitaani nunat annertuunik aatsitassarsiorfiusut kaammattorpai aatsitassanut tunngatillugit misissuisarnermi peqatigiinnertik annertusissagaat, Kalaallillu Nunaannik suleqateqaleqqullugit, aatsitassanik inuiaqatiginnut pingaarutilinnik pissarsiniartarneq pineqartillugu Kitaamiut Kinamik pinngitsuuisinnaajunnaarnissaat pinaveersaartinniarlugu.

Tuluit Nunaanni isumalioqatigiissitap Polar Research & Policy Initiativep 42-nik quppernilimmik misissueqqissaarsimanerani Kalaallit Nunaat qitiutinneqarluinnarsimavoq, tassa Kitaamiut aatsitassat inuiaqatigiinnut pingaarutillit pillugit siunissami Kinamik pinngitsuuisinnaajussanngippata kitaani periarfissat eqqarsaatigalugit.

Nunat aatsitassarsiornermik ingerlatsinerusut

Misissueqqissaarnermi Kalaallit Nunaanni aatsitassarsiorfissatut ilippanaatillit qanoq pingaaruteqartigineri qulaajaaffigineqarsimapput, peqatigitillugulu erseqqissaassutigineqarsimalluni, Kinap Issittumi suliaqarnera sammineqaraluaqisoq, aatsitassarsiorfiit Kalaallit Nunaanni aatsitassarsiornissamut akuersutilinnit 41-sunit 27-t nunanit pingasuneersunit ingerlanneqartut : Tuluit Nunaat, Canada Australialu.

Polar Research and Policy Initiative

Nalunaarusiamik allaqarsimasup Dwayne Menezesip erseqqissaassutigaa, kitaani nunat aatsitassarsiorfiusut anginerpaat tallimat – USA, Tuluit Nunaat, Canada, Australia New Zealandilu misissuisarnermi suleqatigiinnertik, Five Eyes Alliance, annertusisariaqaraat aatsitassarsionermilu suleqatigiiffik pilerseriarlugu Kalaallit Nunaannik suleqateqalerlutik.

Sakkutooqarneq imaluunniit aatsitassat

Dwayne Menezesip oqaatigaa, Issittumi sakkussiornerulerneq USA-llu tassunga atatillugu suliaqartarnera ukkatarineqarluartut. Oqaatigerusutaali tassaavoq, siunissami isumannaallisaanermut politikkissaq aatsitassanik inuiaqatigiinnut pingaarutilinnik pissarsisarnissamut attuumassuteqartoq, tassa mingutsitsinngitsumik nukissiuuteqarnissaq teknologeqarnissarlu pillugit silap pissusaanut atatillugu anguniakkat naammassisinnaaniarlugit, taamalu Kitaani suliffissuit pisariqartinneqartunik aatsitassanik aatsitassanillu qaqutigoortunik pissarsisinnaalissallutik.

Nalunaarusiami nunani taakkunani tallimani naalakkersuisut, aatsitassarsiorfiit ilisimatusarfiillu kaammattorneqarput, isumalluuteqarneq, aatsitassarsiorfinnik ingerlatsinermut aningaasaliissuteqartarneq teknikkikkullu ilisimasaqarneq pillugit suleqatigiinneq nukittorsarniarlugu naapeqatigiillugit ”Five Eyes Critical Mineral Alliance” pilersissagaat.

- Tamanna tunngavigalugu aatsitassanik nunanut kitaamiunut aningaasaqarnikkullu isumannaatsuunissaannut pingaaruteqarluinnartunik isumannaatsumik, patajaattumik, piujuartitsisumik, tatiginartumik nukittuumillu pilersuisinnaaneq qulakkeerneqassaaq, misissueqqissaarnermi allassimavoq.

Dwayne Menezesip oqariartuutigisani Sermitsiaq.AG-mut itisilerlugu imatut oqaatigaa:

- Oqariartuutiginiagara tassaavoq, Five Eyesimi suliaqartut - Kitaata isumannaatsuuneranik patajaattuuneranillu napatitsisut - aningaasarsiornissamut ilisimasaqalernissamullu pissarsiffiusinnaasunik allanik suliffeqarfiit saaffigisinnaasaannik pilersitsiniarlutik nukissanik katersinngippata, suliffeqarfiit nunallu Kinamut saaffiginnittarnerat pillugu naammagittaalliorsinnaanngilagut, Dwayne Menezes Londonimi allaffimminit nassuiaavoq.

Kalaallit Nunaannik isumaqatigiissuteqarneq

Misissueqqissaarnermi erseqqissaatigineqarpoq, Kalaallit Nunaat nunarsuarmi suleqatissatut piukkunnarnerpaasoq. Tassungalu atatillugu isumalioqatigiissitami allassimasup oqaatigaa, Five Eyesimi taamatut suleqatigiinnermi Tuluit Nunaata Kalaallillu Nunaata niuernermi isumaqatigiissuteqalersinnaanerat qitiulluinnarsinnaasoq.

Dwayne Menezes isumaqarpoq, taamatut suleqatigiilertoqarsinnaanera EU-mit akuersaarneqartariaqartoq.

- Aatsitassat pingaaruteqarluinnartut pineqartillugit Five Eys EU-lu suleqatigiittariaqarput, taanna oqarpoq.

Nalunaarusiaq tamaat atuaruk: The Case for a Five Eyes Critical Minerals Alliance: Focus on Greenland.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER