Tunngaviusumik inatsisissaq pillugu isumalioqatigiissitaq

Isumalioqatigiissitaq suli akerleeriiffiusoq

Tunngaviusumik inatsisissaq pillugu isumalioqatigiissitami kikkut ilaasortaassanersut akerleriissutaanera suli naammassineqanngilaq. Tunngaviusumik inatsisissaq pillugu isumalioqatigiissitaq naapertorlugu Atassut isumalioqatigiissitami inissaqartussaangaluarpoq. Tamanna partiip siulittaasuata Siverth K. Heilmannip erseqqissarpaa.

Atassutip siulittaasuata Siverth K. Heilmannip isumalioqatigiissitami allassimasoq tikkuarpaa:

"Qaqugukkulluunniit Inatsisartunut qinersinerup kingullerpaap kingorna Inatsisartuni partiit angissusaannik sanilliussineq apeqqutaatillugu partiit sinniisuutitaqartinneqassapput. Tamanna isumaqarpoq, qinersinerit akornanni Inatsisartut katitigaaneranni allannguutit Tunngaviusumik inatsisissaq pillugu Isumalioqatigiissitap katitigaaneranik allannguinermik kinguneqassanngitsut"

Siulittaasoq pakatseqqasoq

- Isumalioqatigiissitami Naalakkersuisut annaasaqartimmatigut, pakatsissutigaara. Isumalioaqatigiissitaq naapertorlugu qinersisitsinnik tapersersorneqarnerput tunngavigalugu partiitut qinigaasimavugut, tamannalu partiimut inissanik marlunnik inissaqartitsivoq. Ilaasortallu taakkua marluk partiimut allamut nuunnerisa kingunerisaanik piviusoq allanngortissinnaanngilaat, tassa qinersisoqarnerani qinerisartuniit tapersersorneqarnerput, tamannalu partiitta isumalioqatigiissitami inissaqarnissaanut pisussaaffiliivoq, Siverth K. Heilmann Sermitsiaq.AG-mut oqarpoq.

Taanna isumaqarpoq, Kalaallit Nunaata namminiliivinisssaanut suliaqarnermi Atassut pisariaqartinneqartoq.

- Tunngaviusumik inatsisissaq pillugu isumalioqatigiissitaq Kalaallinut Nunaanut tamarmut sullissisussaavoq. Peqataatitaqarnissarput pisariaqarpoq, Siverth K. Heilmann, Inatsisartuni inatsisinut ataatsimiititaliami siulittaasumik
Anders Olsenimit tapersorneqartoq, erseqqissaavoq.

Nuna tamakkerlugu siulittaasoq Mala Høy Kúkomut sinniisussaasimavoq, taamaammat isumalioqatigiissitami inissaqarnini pisussaaffittut isigingaluarpaa, tamannalu Suka K. Frederiksenip sisamanngormat atorunnaarsippaa.

IA-p ilaasortaatitaa amigaataasoq

Ane Hansenip borgmesteritut sulinissani pillugu sulinngiffeqalersimasup kimik taarserneqarnissaa, IA-miit suli nalunaarutigineqarsimanngilaq.

Powered by Labrador CMS