Isumalioqatigiissitaq akerleriissutaasoq immikkut millioninik immikkoortitsivigineqartoq

Tunngaviusumik Inatsisissaq pillugu Isumalioqatigiissitap suliaqarnissaa ukiuni marlunnik sivitsorneqarpoq, tamanna immikkut 11 millioner koruuninik aningaasartuutigineqassaaq.

Tunngaviusumik Inatsisissaq pillugu Isumalioqatigiissitap ukimut pissarsiarisartagai 214.000 koruuninik qaffaavigineqassasut, 2019-imut aningaasanut inatsisissatut siunnersuummi allassimavoq. 2018-imi 5,526 millioner koruuniniit 2019-imi 5,740 millioner koruuninut.

Ukiumik ataatsimik sivitsuineq

Isumalioqatigiissitallu sulinera ukiunik marlunnik sivitsorniarneqarpoq, tamanna pilersaarutigineqarsimasumit immikkut 11,4 millioner koruuninik aningaasartuutigineqassaaq. Inatsisartunut qinersisoqarnera pissutigalugu isumalioqatigiissitap sulineranut kinguaattoortitsingaatsiarpoq, tamatuma kingunerisaanik isumalioqatigiissitap sulinera sivitsorneqarpoq.

Nunamut Namminermut Naalakkersuisoq Vittus Qujaukitsoq Sermitsiaq.AG-mut paasissutissiivoq, isumalioqatigiissitap sulinera kingusinnerpaamik 2020-mi naammassissasoq.

Ilaasortat nutaat

Tunngaviusumik inatsiseqalernissamut isumaqatigiissitami ilaasortat qinigaasimanngitsut ataatsimiinnissamut piareersaaneranni ataatsimeeqataanerannilu aningaasarsiassaannut atugassat aningaasanut inatsimmi 2018-imiit 2019-imi 214.000 koruuninik qaffariaateqarnerinut tunngavilersuutigineqarpoq.

Tassa Inatsisartuni ilaasortat kisimik isumalioqatigiissitami ilaasortaasarnerat atorunnaarsinniarneqarpoq.

Sulisut tallimat amerlinagit sulinerat ingerlatiinnarneqassaaq.

Vittus Qujaukitsup paasissutissiaraa, ilaasortanik qanoq toqqaasoqartarnissaanik inatsitigut tunngaviit sulissutigineqartut. Tamanna aamma nutaamik tunngaviliinissamut atuuppoq.

Taassuma naatsorsuutigaa, Inatsisartut ulloq 28. september ataatsimiinnissaat sioqqullugu ilaasortat isumalioqatigiissitarlu inissinneqarsinnaasut.

Powered by Labrador CMS