Isumalioqatigiissitami nutaami angutit arnallu amerlaqatigiissapput
Tunngaviusumik inatsisissaq pillugu isumalioqatigiissitami nutaami ilaasortat angutit arnallu assigiimmik avinneqassapput.
Aalisarneq pillugu ataatsimiititaliarsuup ilaasortai akerleralugit, marlunnik arnartaqarlunilu qulinik angutitaqartoq, Tunngaviusumik inatsisissaq pillugu isumalioqatigiissitassap naligiissitaaneq pillugu inatsimmut naammassinninnissaa, Vittus Qujaukitsup qulakkeerniarpaa.
- Tallimanngornerup tungaanut Inatsisartuni partiit tamarmik ilaasortanik Tunngaviusumik inatsisissaq pillugu isumalioqatigiissitamut ilaasortanngortinniakkaminnik marlunnik taasissapput – angut ataaseq aamma arnaq ataaseq, Vittus Qujaukitsoq ilisimatitsivoq.
Tullia sinniisunngussaaq
Tunngaviusumik inatsisissaq pillugu isumalioqatigiissitamut ilaasortanngunngitsoq, sinniisunngornissaa pilersaarutaavoq, ilaasortarlu ataaseq tunuartariaqalerpat sulinermut ilanngutissalluni.
Vittus Qujaukitsup isumalioqatigiissitap suliassaata nassuiarneqarnera pillugu itinerusumik oqaaseqarfigerusunngilaa. Inatsisartuni partiit Tunngaviusumik inatsisissaq pillugu isumalioqatigiissitamut ilaasortassatut innersuussassaminnik paasiniaasut ataqqiniarlugit.
Innersuunneqartut Inatsisartunut qinigaasimanissaat piumasaqaataanngitsoq, taassuma ilisimatitsissutigaa. Taamaattumik partiit inummik polikkiunngitsumik suliaqartumik innersuussuteqarnissartik periarfissaraat.