Isumaginnittoqarfik sipaarniarnermit eqqugaanerpaasoq
Aningaasaqarnermut Naalakkersuisoqarfik sipaarutaasinnaasunik nassaarniarluni ulapissimavoq, tamatumalu malitsigisaanik tapiissutissatut ingerlatsinermullu aningaasaliissutinut kontunit assigiinngitsunit 12 millioner koruuninik ilanngaasimallutik.
Aningaasaqarnermut Naalakkersuisoqarfik nunatta karsiata imaanik misissueriarluni kontunit assigiinngitsunit 18-iusunit aningaasanik nuussimmat, isumaginnittoqarfik coronamut akiliuteqarnerpaasussanngorpoq. Taamaalilluni Pitsaaliuinermut Isumaginninnermullu Aqutsisoqarfik to millioner koruuninik annaasaqassaaq, tassa Aningaasaqarnermut Ataatsimiititaliap Naalakkersuisut sipaarniutaat akuersissutigissappagit.
Sipaarniuteqarnermi tunniussaqarnerpaasussat:
Pitsaaliuinermut Isumaginninnermullu Aqutsisoqarfik: 2,0 mio. kr.
Sanaartornermut Oqartussat: 1,8 mio. kr.
Naalakkersuisut Siulittaasuata Naalakkersuisoqarfia: 1,5 mio. kr.
Peqqissutsimut Naalakkersuisoqarfik: 1,0 mio. kr.
Nunamut namminermut Immikkoortortaqarfik: 1,0 mio. kr.
Sipaarniutigineqartut allat 100.000 koruuniniit (Ineqarnermut Attaveqarnermullu Naalakkersuisoqarfik) Aatsitassanut Aqutsisoqarfimmi 600.000 koruuninut annertussuseqarput, taakkulu katillugitk 12 millioner koruuniullutik.
Sipaarniuteqarneq Covid-19 pissutigalugu ilassutitut aningaasaliiffigineqarnissamik qinnuteqarfigineqarsinnaasutut aaqqissuunneqarsimavoq, Naalakkersuisullu suliaq Aningaasaqarnermut Ataatsimiititaliami sukkasuumik suliarisassanngorlugu nassiussimavaat.
Sermitsiamit paasineqarpoq, Naalakkersuisut qinnuteqaataat Aningaasaqarnermut Ataatsimiititaliami suli suliarineqarsimanngitsoq.