sumiginnaaneq
Isumaginninnermut suliat qummut killilerneqarnissaat siunnersuutigigaat
Atorfillit kattuffiata AK-p isumaginninnermut tunngatillugu suliassarpassuit qaleriiaartut ilisarisinnaavaat
Inunnik isumaginninnermut siunnersortit imaluunniit kommunini inunnik isumaginnittoqarfinni sullissisut allaffimmi nerrivimminni sulianik 100-nik suliassaqartarnerat nalinginnaasuuvoq.
Tupaallattoq
Taamaattorli Atorfillit Kattuffianni (AK) siulittaasup, Dina Olsenip, Tasiilami meeqqat inuusuttullu pillgit isumaginninnermut suliat amerlassusaat tupaallaatigaa, tassani sulisut pingasut 520-inik sulianik ingerlataqarput.
Atuaruk: Tasiilami meeqqat pillugit isumaginninnermut suliat 500 sinneqartut
Nammineq misissuinerat
Sulisup ataatsip 100-nik suliaqartarnerat paasissutissat, inunnik isumaginninnermut siunnersortit kattuffianni AK-mi misissuinerminngaanneerput, tassa Nunatsinni Inunnik Isumaginninnermik Siunnersortit Ilinniarsimasut Peqatigiiffiata (NIISIP) suliaraat.
Isumaqatigiinniarneq
AK aamma NIISIP qanittukkut pisortani sulisitsisunut piumasaqaatititk, iusmaqatigiinniarnernut pisussanut atatillugu saqqummiuppaat. Tassanilu kattuffiit siunnersuutaasa ilagaat, sulisut suliasa amerlassusaat qummut killilerneqassasut.
- Piumasaqaatigut akuerineqassappata atukkanut ikiuutaasorujussuussapput, sulisussarsiorneq aamma sulisunik tigumminninneq ajornannginnerulertissagaa neriuutiginarpoq, AK-mi siulittaasoq oqarpoq.
- Aningaasaliinertut isigissavarput, tassani nukissat amerlanerusut pinngitsoortissavaat, ilaqutariinni ajornartorsiutit alliartunnginnissaat, assersuutigalugu meeqqat ulloq unnuarlu paaqqinnittarfimmut inissinnissaat pinngitsoortillugu. Taanna aaqqiissut annertullunilu akisuvoq, Dina Olsen erseqqissaavoq.