Isumaginninnermut siunnersorterpassuit uippakajaartartut: Aaqqiissuteqartoqartariaqarpoq

Kisitsisit pitsaanngitsut sumaginninnermut siunnersortit atugaannut tunngassuteqarput.

Atorfillit Kattuffianni ilaasortat isumaginninnermik suliaqartut 42-t akornanni misissuinerup nutaap takutippaa, ajoraluartumik sullivimmi tarnikkut atukkat pitsaanngillat. Kisitsisillu ernumanarluinnarput.

Misissuinermi peqataasut 70 procentiisa sapaatip akunnerini marlunni kingullerni uippakajaarneq misigisimallugu akissuteqarput, Atorfillit Kattuffiallu naapertorlugu uippakajaarnermit artukkerneqarneq annertuvoq.

Atorfillit Kattuffiata 2020-mi uippakajaarnermut tunngatillugu misissuineranut naapertuupput, tassani ilaasortat pingajorarterutaasa missaanniittut piffissap sivisunerusup ingerlanerani uippakajaarneq aqqusaarsimavaat.

Sioorasaarinerit pimmatiginninnerillu

Uippakajaarnermut patsisaanerpaasoq tassaavoq suliffik tassami uippakajaarnermik atugaqarsimasut atugaqartullu 80 procentiisa suliffitsik patsisaanerarpaat. Isumaginninnermik suliallik ataatsimut isigalugu suliaminnik naammassinninnissaminnut atortussaqarluarlutillu sakkussaqarluarput.

Misissuinerulli takutippaa peqataasut 70 procentii suliffimminni suliassat naammaginartumik suliarinissaannut ikippallaarlutik. Isumaginninnermut siunnersortit amerlanerpaartaat sukkasuumik sulisariaqartarnertik misigisarpaat, tamannalu suliaannut pitsaanngitsumik sunniuteqarsinnaavoq.

Affaannit amerlanerusut - misissuineq naapertorlugu – suliassatik angumerisarpaat, kisianni suliassanik naatsorsuutigineqanngitsunit artukkerneqartarput, taakku piffissaqarniarnikkut tatineqartarput – taamaattumillu suliassanik suliaqarnikkut kinguaattoortartut amerlapput.

Isumaginninnermi sulisut tallimaagaangata ataatsip malersuerpalaartumik uumisaarineq misigisaraat aamma maluginiagassaavoq, misissuinerlu naapertorlugu marlunnit pisarpoq: Amerlanertigut uumisaarineq nittartakkatigut naapittarfinni pisarsimavoq sinnerilu sulinerup nalaani orninneqartarnikkut pisarsimalluni.

- Ernumanartoq

Taamaakkaluartoq pingajorarterutaat sinnerlugit sioorasaarneqarneq misigisarsimavaat. Taakkunani 33 procentii aqutsisumit sioorasaarneqarneq misigisarsimavaat, 10 procentii suleqatinit amerlanerpaartaallu sullitaniit sioorasaarneqarneq misigisarsimavaat.

Isumaginninnerup iluani sulisut affaasa missaat suliffimmi aaqqiagiinnginnerit pitsaasumik anigorneqartartutut misigisaraat, misissuinermi naqissuserneqarpoq, amerlaqataasali aaqqiagiinnginnerit naleqquttumik aaqqiiffigineqartanngitsutut misigisarpaat.

70 procentiisa missaat sulinngiffimminni allanik sammisaqarnissamut nukissaaleqisarput. Isumaginninnermi suliat piffissartornarlutillu nukippassuarnik tigusisarnerat suliffiup avataani inuunermut sunniuteqarnerluttarneri aamma misissuinermi erserpoq.

- Suliffiup nukippassuarnik tigusisarnera patsisaalluni atorfillit suliffiup avataani inuunermi nukissaaleqisarneq taamak amerlatigisunit atorneqarnera ernumanarpoq, Atorfillit Kattuffianni siulittaasoq, Dina Olsen oqarpoq.

Aaqqiissuteqartoqartariaqartoq

Taamaattoqarnera isumaginninnermik sulisut sullitaminnit, imaannaanngitsunik inuunermi aqqusaagaqartunit kingunerlutsitsisuniillu, sunnerneqarsimanerannik aallaveqarsimasinnaasoq, taanna isumaqarpoq.

- Inunnik aliasuttunik imaannaanngitsunillu ajornartorsiortunik sullissineq oqimaassinnaaqaaq. Atorfiillillu suliassamik saniatigut pimmatigineqarnermik, sioorasaarneqarnermik, sulisut amigartuarnerannik paasissutissanillu amigaateqartuarnikkut artukkinneqartaramik uippakajaartut taamak amerlatiginerat imminermi tupinnartuunngilaq, siulittaasoq oqarpoq.

Sulisitsisut sulisut pisariaqartitaannut tusarnaarnissamut pikkorinnerusariaqartut, Dina Olsen isumaqarpoq.

- Uagut, AK sulisitsisullu, ataatsimoorluta isumaginninnermi sulisut pillugit aaqqiissutissamik nassaartariaqarpugut, taamaaliornikkullu peqqinnartumik suliffeqarnissaat, kiisalu suliffiup avataani inuunermut nukissaqarnissaat, qulakkeerumallugu. Isumaginninnermi sulisut oqariartuutaat tusarnaarlugu aallartissinnaavugut.