Isumaginninnermut ministeri: Iliuutsigut naammagisimaanngilakka
Danmarkimi angajoqqaat piginnaasaannik misissueriaaseq oqaatsitigut kulturikkullu Kalaallit Nunaannut tulluussarneqassasoq qallunaat naalakkersuisuisa aalajangiuppaat. Kommunit suliaat isumaginninnermut ministerip naammagisimaanngilai, misissueriaaserli ukiut arlallit qaangiuppata piareernissaanut maanna atorneqartoq ingerlaannassanersoq isummerfigerusunnagu.
Qallunaat isumaginninnermut ministeriata Pernille Rosenkrantz-Theilip (Soc.) isumaginninnermut, peqqissutsimut suliffeqarnermullu tunngasunut isumaqatigiissut 2023-miit 2026-mut atuuttussaq sapaatip akunnerata siuliani tallimanngornermi saqqummiuppaa.
Aviisi Sermitsiaq taama allappoq.
Suliniutissarpassuit milliardit koruunit missaanni nalillit akornanni kalaallinut Danmarkimi najugalinnut pingaarutilik ilaavoq. Tassa angajoqqaat piginnaasaannik Danmarkimi misissuisarneq oqaatsitigut kulturikkullu tulluarsarneqassasoq. Taanna meeqqap angerlarsimaffiup avataanut inissinneqarnissaa sioqqullugu kalaallinut angajoqqaanut piginnaasaannut misissuutitut kommuninit maanna atorneqartarpoq.
Suliaq annertooq
Inuit pisinnaatitaaffii pillugit Instituttip ilisimasallillu arlallit misissuutip qallunaanut naleqqussakkap kalaallinut atorneqartarnera isornartorsiornikuuaat. Misissuut angajoqqaat piginnaasaannik inissisimanerannillu eqqortumik takutitsineq ajormat tamannalu kinguneqartarluni meeqqap tunngavissaqanngitsumik arsaarinnissutigineqarneranik.
Misissuutip iluarsaanneqassasut naalakkersuisut maanna aalajangiuppaat. Taassumalu suliarineqarnera minnerpaamik ukiuni marlunni ingerlassasoq Rigshospitalimi Nationalt Videncenterimi ilisimatusarnerup tarnillu pissusaanik ilisimasallip Rune Nielsenip nalilerpaa.
Allaaserisaq tamaat Sermitsiami saqqummersumi kingullermi atuaruk, uani:
