Isumaginninnermi suliniutinut 9 mio. kr. agguaanneqartut
Isumaginninnerup iluani suliniutinut aningaasaliisoqarnissaanut qinnuteqaatit 100-t sinnerlugit tiguneqarsimasuni, 53-it qatillugit 9,3 mio. koruuninik aningaasartalerneqarput. Aningaasat ilaatigut inuit innarluuteqartut peqatigiiffiannut, angutit ikorfartoqatigiinnut aamma qimarnguinnut atorneqassapput.
Isumaginninnerup iluani suliniutinut ukioq manna aningaasaliissutit agguarneqarsimalerput. Suliniarnissamut soqutiginnittoqarluarnera meeqqanut, inuusuttunut, ilaqutariinnut kiisalu peqqinnissamut Naalakkersuisup Mimi Karlsenip nuannaarutigigaa, Naalakkersuisut tusagassiutinut nalunaaruteqarlutik allapput.
- Innuttaasut ikiorniarlugit taama amerlatigisut allannguerusunnerat nuannaartunartorujussuuvoq. Piffissaq ungasinnerusoq isigalugu suliniutit taakku sullinniakkanut iluaqutaanerisa saniatigut inuiaqatigiinnut tamakkiisumut iluaqutaassaaq, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen oqarpoq.
Aningaasat agguaanneqartut meeqqanut, inuusuttunut ilaqutariinnullu pisariaqartitsisunut atortussanngortinneqarput. Qinnuteqartuni 101-iusuni 53-it aningaasanik taperneqarnermut uppernarsaammik allakkiamik, isumaginninnermut aqutsisoqarfimmit nassinneqarsimalereerput.
Aningaasaliissutissat illikartinneqarsimasut marloriaataasa nalinginut qinnuteqartoqarsimavoq. Qinnuteqartullu taama amerlatigineri takussutissaavoq innuttaasut isumaginninnerup iluani aaqqiissuteqarnissamut soqutiginnilluarneranut, naalakkersuisut isumaqarput.
Suliniutit assigiinngisitaartut taperneqarput
Inuit innarluuteqartunut suliniaqatigiit taperneqarnissaat ukioq manna salliutinneqarsimavoq. NIIK (Nunatsinni Inuit Innarluuteqartut Kattuffiat) suliniummik Ikiorneqarnissamik ilisarnaammik (Solsikkesnoren)-imik aallarniinissamut ilaatigut tapiivigineqarsimavoq. Suliniut pillugu suleqatigiinneq innarluutinik ersinngitsunik takussaasunngortitsivoq naatsorsuutigineqarporlu peqatigiiffimmut patajaallisitsissasoq.
Pinaveersaartitsiniarluni suliniutinut allanut tapiisoqarsimavoq, tapiivigineqartoq tassaavoq Kommuneqarfik Sermersuumi angutinut ataataasunut oqaloqatigiittarfik.
Qeqertalimmi qaammarsaalluni suliniut Timi Tarni aamma tapiivigineqarpoq. Kiisalu kommunini tamani qimarnguiit, tassa Aasianni, Ilulissani, Narsami, Paamiuni, Nuummi aamma Qaqortumi, ingerlanneqarneri tapiivigineqarlutik.
Aammattaaq ilaqutariinnut paarsisartunut suliassaqarfiup tapiivigineratigut sulianik suliarinnittarnerup pitsanngortinneqarnissaa qulakkeerneqassaaq ilaqutariillu paarsisartut patajaallisinneqassallutik.