Isumaginninnermi suliassaqarfik allanngortinneqartoq
Isumaginninnermut Naalakkersuisoqarfik naalakkersuisooqatigiinnissamut isumaqatigiissummi nutaami annertuumik allanngortinneqassaaq, isumaginnittoqarfimmilu sulisut meeqqanut, inuusuttunut ilaqutariinnullu naalakkersuisoqarfimmut nutaamut nuunneqassallutik.
Meeqqat inuusuttullu amerlavallaat ilinniagaqaqqittannginnerat imaluunniit sulilertannginnerat Nunatsinni inuiaqatigiinnut annertuumik unammillernartutut qitiusut ilagaat, tamannalu naalakkersuisooqatigiit nutaat aaqqiissuteqarfiginiarpaat.
Eqaluk Høegh Meeqqanut, Inuusuttunut Ilaqutariinnullu Naalakkersuisoqarfimmi naalakkersuisuunermi saniatigut Inatsisinik Atuutsitsinermut Naalakkersuisuusussaq isumaginninnermut naalakkersuisoqarfimmi maannamut sulisimasunik sulisoqassaaq.
Ajunngitsumik siunertaqarneq
- Isumaginninnermut Naalakkersuisoqarfimmi sulisut meeqqanik, inuusuttunik ilaqutariinnillu sullissisimasut naalakkersuisoqarfimmut nutaamut nuunneqassapput. Isumaginninnermut Naalakkersuisoqarfik sulisunik annaasaqassaaq, malugineqassaarli sulisoqarnermi pissutsit ilanngussimagatsigit, tamanna ajunngitsumik siunertaqarnermik tunngaveqarpoq, Múte B. Egede Sermitsiaq.AG-mut nassuiaavoq.
Taanna isumaqarpoq, suliffeqarnermi pissutsit isumaginninnermilu unammilligassat meeqqanut inuusuttunullu attuumassuteqanngitsut imminnut ataqatigiittut, ingerlatsinissamullu aaqqissuussaq nutaaq allaffissornikkut naammassisaqartarnerunissamik anguniagaqarfiuvoq. Mimi Karlsen isumaginninnermut sulisoqarnermullu naalakkersuisunngorpoq.
Nutaaliorneq
Meeqqanut, Inuusuttunut Ilaqutariinnullu Naalakkersuisoqarfiliorluni nutaaliorneq, ukiuni arlalinni Siumut Naalakkersuisuutitaqareersoq Kalaallit Nunaanni politikkikkut nutaaliornermut takussutissaavoq.
- Nunatsinni meeqqat qanorluunniit atugaqaraluartut ineriartornissamut atuarnissamullu periarfissinneqassapput, naalakkersuisooqatigiinnissamut isumaqatigiissummi allassimavoq.
Siusissukkut iliuuseqarneq
- Inuusuttut amerlavallaat inuunerminni sorusunnerlutik nalusarpaat. Inuusuttut taakku suliffeqalernissaannut imaluunniit ilinniagaqalernissaannut tapersissavavut. Tamanna kommuninik qanimut suleqateqarnissamik pisariaqartitsivoq, aamma angajoqqaat peqataatillutigt siusinnerusukkut iliuuseqaartoqartariaqarpoq, isumaqatigiissummi allassimavoq.
Meeqqat Illersuisuat isumaqatigiissummi aamma eqqaaneqarpoq, taannalu meeqqat atugaannik pitsanngorsaalluni suliaqarnermut peqataatinneqassasoq takuneqarsinnaavoq. Soorunami meeqqat illersuisuata Aviâja Egede Lyngep meeqqat atugaannik ukkataqarniarluni KNR-imut oqaaseqarsimasup tamanna nuannaarutigaa.