Isumaginninnermi suliaqartut - sulinerminni unamminartorpassuaqaraluartoq - iluarisimaarinnipput
Akissarsiat appasissut, suliat imaannaanngitsut, pappilissaallu amerliartuinnartut. Isumaginninnermi sulisutut atorfeqarneq nungullarsaataasinnaavoq, tupinnaannartumilli amerlanerit suliffimminni ingerlalluarput
isumaginninnermik sulisut tatineqarsimaqisut tupinnaannartumik suliffimminni ingerlalluarput. Tamanna sulinermi atugaannik misissuinerup annertuup nutaap takutippaa.
Aviisi AG taama allappoq.
Nalunaarusiaq ukiut qulit sinneqartut ingerlaneranni taamaattuni siullersaavoq suliassaqarfimmilu sulisunit 200-nit akissutit pineqarlutik. Ilisimatusarfimmi inuiaqatigiilerinermi lektorimit Steven Arnfjordimit suliaavoq:
- Isumaginninnerup iluani suliaqartut amerlanersaat tassalu sisamaagaangata pingasut misigisarpaat suliffitsik nuannaralugu. Ikinnerit, sisamararterutaat, ulloq suliffiusoq naagaangat qasulluinnartutut misigisimasarput.
Akissarsiat
Isumaginninnerup iluani suliaqartut sulisullu suliassaqarnerujartuinnartut taarsikulasullu atugaat naalakkersuinikkut alaatsinaaneqaqqammerput.
Akissarsiat appasipput. Amerlanerit 20.000-it 30.000 koruunillu missaanni akissarsisarput, aammali ilaqarput qaammammut 20.000-it ataallugit akissarsisartunik, misissuinerup takutippaa. Taassuma saniatigut suliassanik 100-nit amerlanerusunik ingerlataqarsinnaasarput.
Immaqa ilimagineqarsinnaagaluarpoq taamak suliassaqartiginermikkut ilaat qasusoortassasut imaluunniit stresserlutik, nukissaarullutik iluaalliorlutillu. Steven Arnfjordilli misissuinerata tamakkiisup akerlerluinnaa takutippaa. Taamaallaat quliugaangata ataaseq nukissaaruttutut misigisimasarpoq. Ataasiakkaanut eqqugaasunut ajornartorsiutaasarpoq annertooq.
- Sivisuumik napparsimasoqalertoqarsinnaavoq piffissap ilaani suliffeqarnermit anilluni, Steven Arnfjordip erseqqissarpaa.
Allaaserisaq tamakkiisoq aviisimi AG-mi atuarsinnaavat. Uani ataaniittoq toorlugu aviisi pissarsiarisinnaavat: