Isumaginninnermi ataatsimiititaliaq: Narsami Nanortalimmilu allaffissorneq pitsanngorsarneqartariaqarpoq
Kommune Kujallermi inunnik isumaginninnermi ataatsimiititaliaq, sulisut atorfillillu inunnik isumaginninneq eqqarsaatigalugu ulluni pingasunik isumasioqatigeeqqammerput. Isumasioqatigiinnermilu Qaqortup avataani allaffissornerup pitsanngorsarneqarnissaa isumaqatigiissutigineqarpoq.
Isumaginninnermi ataatsimiititaliami siulittaasup oqaasii naapertorlugit Narsami Nanortalimmilu innuttaasut kommunimiit pitsaanerusumik sullinneqarnissartik kissaartigaat. Maannami allaffissorneq annerpaaq Qaqortumi suliarineqartarput.
- Oqarsinnaavunga innuttaasut pitsaanerusumik sullinneqarnissartik kissaatigigaat, taannalu tunngavigalugu Narsami Nanortalimmilu pissutsit eqqartorpavut. Taakkunani allaffissorneq assigiittorujussuuvoq, sulisullu ikippallaarnerisa pissutaalluni innuttaasunut sullissineq ilungersunarsinnaasarluni, Pipaluk Larsen-Petersen Sermitsiaq.AG-mut nassuiaavoq.
Kommune Kujallermi innuttaasut katillugit 6.400-it missaaniipput, taakkunanngalu 2.300-t Narsami Nanortalimmilu najugaqarlutik. Kommunillu qitiusumik allaffeqarfiani, Qaqortumi 3.000-inik inoqarpoq.
Pisortanik siaruaaneq
Isumasioqatigiinerup ingerlanerani ilaatigut eqqartorneqarpoq qanoq sulisunik amerlanerusunik atorfinitsitsisinnaaneq kommunip iluani atorfiit allat atorunnaarsinnakkaluarlugit. Innuttaasunut sullissineq pitsaanerulissappat kommunimullu annertunerusumik naleqassanngippat pisortat assigiinngitsut qanoq pitsaanerusumik kommunimut tunniussisinnaanersut eqqartoqarneqarpoq.
- Ingerlatsineq pitsanngorsarniarlugu qanoq allannguisinnaavugut, allaffissornerlu qanoq ililluta siaruarsinnaavarput pisortanut annertunerusumik kinguneqartitsinngikkaluarluta. Tamannalu misissussavarput innuttaasunut sullissineq pitsanngorsarniarlugu, Pipaluk Larsen-Petersen oqarpoq.
Ingerlatsinermi allannguinerit
Qineqqusaarnerup ingerlanerani allaffissornermi allannguisoqartoqartariaqartoq neriorsuutigineqarpoq. Innuttaasunummi sullissinerup ilungersunarsinnaasarmat. Innuttaasut ilai qaammatini arlalinni kommunimiit akissutissarsinissaminnut utaqqisariaqartarput, tamannalu kommunip allanngortinniarpaa.
- Anguniagassarput ataasiinaavoq, tassa innuttaasunut sullissinerput ingerlatsivinni assigiinngitsuni pitsanngorsarnissaa. Immikkoortortat tamarmik innuttaasunut sullissineq eqqarsaatigalugu allannguinissamik siunnersuuteqartussaapput. Ingerlatsinermi allannguineq februarimi oqallisigisussaavarput, neriuutigaarpullu juunip aallartinnerani aallartissinnaalluta, borgmesteri Stine Egede (IA) Sermitsiaq.AG-mut oqarpoq.
Isumasioqatigiineq ulluni pingasuni ingerlanneqarpoq, tassanilu aamma illuatungiliuttut Siumut aamma peqataapput. Kommunalbestyrelsimi ilaasortaq Karen Kyed Frederiksen (S) isumasioqatigiineq iluarisimaarpaa qanorlu allannguinerit inerneqarumaarneri pissanngatigalugu.