Isumaginninneq: Sulisut pingasuugaangata marluk suliamut attuumasumik ilinniagaqarsimasanngillat
Kommunini tallimani sisamat isumaginnittoqarfiini atorfillit pingajorarterutaat kisimik isumaginninnermi siunnersortitut isumaginninnerulluunniit iluani siunnersortitut ilinniagaqarsimasarput. Sulisut amerlanerusut suliamut tunngatillugu piginnaanngorsarnissaannut Naalakkersuisut suleqataajumapput.
Kommunini sisamani isumaginnittoqarfimmi sullissisut 64-iusuni 21-t isumaginninnermut siunnersortitut ilinniagaqarsimapput imaluunniit isumaginninnikkut suliaqarnermi siunnersortitut ilinniagaqarsimasuullutik.
Sulisut sinneri isumaginninnikkut tunngasutigut ilinniagaqarsimasuunngillat.
Ajornartorsiut tamanna aaqqiivineqartariaqartoq, Naalakkersuisut isumaqarput.
Kommunini tallimaasuni sisamat ilisimatitsipput atorfiit inuttaqartut arlaqartut isumaginninnikkut tunngasutigut ilinniarsimanngitsunit inuttaqartinneqartut.
Kommunit paasissutissanik tunniussisut tassaapput Avannaata Kommunia, Kommune Qeqertalik, Qeqqata Kommunia aamma Kommune Kujalleq.
- Atorfinitsitsinerni procenti annertugaluartoq isumaginninnikkut tunngasutigut ilinniagaqarsimasut ikippallaarujussuarput, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen (IA) tusagassiorfinnut nalunaarummi oqarpoq.
Kommuneqarfik Sermersuumi meeqqanut tunngasuni sullissisut 50,5-iupput, taakkunannga 27,5 isumaginninnermi siunnersortitut ilinniagaqartuullutik. Inersimasunik sullissisut 6-7-iupput, taakkunannga pingasut isumaginninnermi siunnersortitut ilinniarsimasuullutik.
Piginnaasat qaffassarneqassapput
Sulisut piginnaasaat annertusarniarlugit Naalakkersuisut kommuninik maanna suleqatiserinnipput.
- Isumaginninnermut siunnersortit isumaginninnikkullu suliaqarnermi siunnersortit amerlanerusut pisariaqartippagut. Meerartagut inuusuttortagullu kiisalu inuit innarluutillit pitsaanerusumik sullinneqartarnissaat qulakkeerniarlugu sulianik suliarinnittartut attuumassusilimmik isumaginninnikkut tunngasutigut ilinniagaqarsimanngitsut amerlasuut piginnaasaqarnerulersissavagut, naalakkersuisoq oqarpoq.
Isumaginninnermi siunnersortit peqatigiiffiata siorna misissuinerata takutippaa kommunini isumaginninnermi sullissisut ilinniarsimasut amigaataasut. Atorfiit 231-iusuni, kommunini tamani, 2022-mi 77-it isumaginninnermi siunnersortinik inuttaqarput.
- Nuna tamakkerlugu ilinniagaqarsimasunik sulisussarsiortarneq ilungersunartuusoq nalunngilarput. Kisianni sulianik suliarinnittartut atugaannik pitsaanerusumik pilersitsinissatsinnut tamassuma unitsissanngilaatigut, Mimi Karlsen oqarpoq.