Skip to main content

Isuma: Jens-Erik Kirkegaard - tillitanik tuniniaasartuugavit?

Aviisip naqitap Sermitsiap elektroniskertaani nissiaqqamik akornusersuisoqarsimavoq. Ivars Silisip isumaliutersuutaa eqqorlugu. Tamanna pissutigalugu isumaliutersuut tamaat site-mi uani ilanngupparput - Jens-Erik Kirkegaard - tillitanik tuniniaasartuugavit?

Novembarip 28-anni aviisimi ullut tamaasa saqqummersartumi Information, NGO-nit aamma politikerinit Kalaallit Nunaannik ilisimasalinnit attuumassuteqartuniillu allaaserisaq atuarneqarsinnaavoq, Australiamiut aatsitasarsiornermik ingerlatsiviutaanni GMEL (Greenland Minerals and Energy Limited) piginnittuunermut pasinapiluttoqarsinnaasunut tunngasut. Aningaasaliisartut pingaarnerit ilaat, arlaqarsimanngikkunik Somaliamiunik sakkutuunik aamma nunat tamalaat akornanni mafianut attuumassuteqarunartut. Tassa ingerlatsiviup taassuma ataani ingerlatsivik GME A/S, Kuannersuarni uranimik qalluivimmik aallartinniarluni ilungersuuteqartoq, aamma Inatsisartut siulittaasuata Lars-Emil Johansenip siulersuisuni siulittaasuuffigisaa kingornalu siunnersortaaffigisaa siorna Inatsisartunut qinersinerup kingunerujussua ilanngullugu.
Paasissutissanut taakkununnga Aatsitassanut, Inuussutissarsiornermut Suliffissaqartitsinermullu Naalakkersuisoq decembarip 16-ianni qanoq akiva?
- Aap, uagut naalakkersuisuutitatta suliassarinngilaat kisianni Australiami oqartussaasut suliassarivaat ingerlatsivimmik piginnittunik paasiniaanissaq aamma ingerlatsiviup Kalaallit Nunaanni sulinermini eqqortumik pissusilersorsimanersoq.
Oqaaseqaatit taakkua marluk ulussaarsuartut sakkortutigisumik akerlilersorneqartariaqaraluarput. Nunatsinni politikkimik ingerlatsisuni illuatungiliuttut aamma tusagassiiviit oqaaseqaatip sakkortussusianit oqarsinnaajunnaartitaasimagunarput imaluunniit juullimut ulapaarnermik tiguartissimangaaramik, naalakkersuisut ileqqussaq akimorlugit oqaaseqaataat iliuusaallu soqutaajunnaarsimallutik.
Jens-Erik Kirkegaard, oqaaseqaatitit allaanngillat Aron Kleistip tupilaliaanik matumi 100 koruunilerlugit tuniniaalluni uukapaatitsiniutit, imaluunniit assersuummik allamik atorlanga, illit siornatigut IT-mik siunnersortitut pinngitsoornatit paasisinnaasariaqakkattut nassuiaalanga. Illit akissutit assigiinnarpaa matumi kasuttortumit Apple-computerimik pisinniarfimmi akiata ilamininnguanik akilerneqaqqullugu tuniniaaffigitilluni – taavalu tuniniaasoq soorunami inussiarnisaartoq pissuserissaarlunilu qarasaasiap suminngaanneerneranik apereqqaarnaguluunniit pisiaralugu.
Tassa tillikkanik pisineq aamma inuinnaat iliuuserippassuk pinerlunnerusoq, kisianni naalakkersuisunut taamaassimanngeqqooqaaq, imaluunniit maannakkut naalakkersuisunut Siumukkummi naalakkersuisuutitaat tillikkanik pisinniaqqooqaat.
Jens Erik Kirkegaard tillikkanik tuniniaaqqittarpit?
Tamatta pisooqataatilerniarpisigut?
Soorunami kikkut aatsitassatitsitsinnik qalluisinniarlugit nunatsinnukartinnerivut ilisimasariaqarparput. Kikkut nunatta meeqqattalu siunissaat pillugit tatigisinnaanerlutigit nalunngittariaqarparput.
Imaassinnaavoq illit GME-p manna tikillugu nunatsinni iliuuserisimasai isornartoqartinngikkitit allalli isorisassaqarput. Aaku assersuutissat marlussuit.
Ingerlatsiviup piffissaq tamaat illuatungiliuttut isumaannik allanngortitsiniarsimapput. GMEL-ip Australiami angerlarsimaffigisamini Kuannersuarni suliniut uranisiorfittut saqqummiuttuaannarsimavaa, paarlattuani Kalaallit Nunaanni urani tassanngaannaq saniatigooralugu qallorneqartussanngortinneqarpoq. Aammami iiuminarnerugami. Tassa isummanik sangutitsiniarneq.
Kiammi eqqaamanngimmagu ingerlatsiviup siornatigut pisortaanera Ole Ramlau-Hansen, partipolitikkimut akuliulluni aviisitigut takisuuliorluni Siumup uranitalinnik qallueqqusinngilluinnarnermik atorunnaarsitsiniarnera nersualaarlugulugu erseqqissaatigimmagu.
Aatsitassarsiornermik ingerlatsiviit taamaattut aatsitassanut politikkitsinnik aqutsissagamik?
Aamma sooq ingerlatsiviit GMEL-itut ittut uagut nunatsinni ileqqorissaarnerussappat allanit taamaattaratik?
Immaqa aallarteqqaaraangamik kisianni tamatigut piffissaq tamaat taamaattanngillat.
Pissutsit nalunngilaat. Oqaluttuassartaqareerput.
Mafia aningaasanik qernertulianik nunani allani errortuigaangamik smokingilerlutik kusanaqqissaartunik neriniartarfinnik ammaasarput assersuutigalugu Tysklandimi Frankfurtimi. Sinnerili kingulliusarput ikiaroornartumik aningaasarsiorluarneq aamma trafficking aallartittarlutik tassa atortittartuuteqarnissamik aallaavilimmik inunnik niuerneq.
Jens-Erik Kirkegaard, naalakkersuisunut ilaasortatut isertuussimanngilat illit nammineq aatsitassat pillugit isumaviit toqqortarilersimagit ullumikkut nunatsinni politikkimik ingerlatsisunut aamma aaqqissuussinerit tulleriiaarnerat soqutiginnginnakku saaffigisarpatit: Inatsisartut siulittaasuat Lars-Emil Johansen, Aatsitassaqarnermut, Inuussutissarsiornermut Suliffissaqartitsinermullu naalakkersuisoqarfiup pisortaanera Jørn Skov Nielsen kiisalu Aleqa Hammond.
Kisiannili Jens-Erik Kirkegaard, illit oqaaseqaatit atsiugaraatit. Tulliani qinersisoqalerpat – qaqugukkulluunniit pisinnaammat – qinersisartunit oqaatsitit pillarneqassapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER