Issittumut ministerip kissaatigineqarnerani IA kisimiittoq
Issittumut ministerip piumasarineqarnera partiit tamarmik kingumut allariarnertut Nuummi qinersisisartunik ataatsimiititsisoqarnerani nalilerpaat.
Nuummi qinersisartunik ippassaq ataatsimiititsisoqarnerani siullermi Katuami inersuaaraq ulikkaavippoq, inuillu inersuarmi saarlermi nikorfasariaqarput.
Qinigassanngortittut aallaqqaammut inuummarippasipput, kisianni folketingimi sulinissamut neriorsuutit aalajangersimasut oqaatigineqanngillat.
Issittumut akisussaasumik ministereqalernissamik IA-p piumasaqarnera pillugu inersuarmit aperisoqarmat, oqallinneq aalajangersimasumut tunnganerulerpoq. Siunnersuut partiit sinnerinit isumaqataaffigineqarpallaanngilaq. Suleqatigiissitsisunit Partii Naleqqamut isumassarsiaq assigiingajammik itigartitsissutigineqarpoq.
- Siornatigut Kalaallit Nunaannut ministereqarnikuuvoq. Periusitoqqamut uteqqittoqarnissaa tunngavissaqartinngilara, Steen Lynge Demokraatineersoq taama oqarpoq. Oqaaseqarneq taanna asseqqinnaangajaanik Looqi Sigurdsenimi Suleqatigiissitsisuneersunit, Pele Brobergimi Partii Naleqqameersumit, Bentiaraq Ottosenimit aamma Aki-Matilda Høegh-Damimit Siumumeersumit uteqqinneqarpoq.
- Danmark annertuallaamik aalajangiiffeqareerpoq, nammineq aalajangiisinnaanerussaagut. Issittumut ministeriaqarfik sooq Danmarkimiissava. Issittumut ministeriaqarfeqassappat maani inissisimassaaq, Aki-Matilda Høegh-Dam taama oqarpoq. Taamaalillunilu Siumumit qinigassanngortittup ajornanngisaaraluni nunanut allanut tunngasunut politikkip danskit oqartussaaffigigaa aamma imaaliallaannaq tiguneqarsinnaannginnera avaqquppaa.
Naalagaaffeqatigiinnermut siunnersuisoqatigiit
Issittumut ministeriaqarfimmut taarsiullugu naalagaaffeqatigiinnermut siunnersuisoqatigiinnik, naalagaaffeqatigiiffinnit pingasunit inatsisartunik ilaasortaqartumik aaqqiisoqarnissaa, Looqi Sigurdsenip Suleqatigiissitsisuneersup siunnersuutigaa.
Siunnersuut Danmarkip kalaallit inuiaqatigiinni pisuni sunniuteqarsinnaaneranut tunngassuteqanngitsoq, Aaja Chemnitz Larsenip Inuit Ataqatigiinneersup naqissuserpaa, akerlianik kalaallit danskit suli akisussaaffigisaanni sunniuteqarsinnaanerannut qulakkeerinninniarnerarluni.
- Ukiut kingulliit ingerlanerani Kalaallit Nunaat sinnerlugu oqaluttuarisaanermi aatsaat taama sunniuteqartigilerpugut; kisianni naalakkersuisuni toqqaannartumik ilaasortaaqataagaanni sunniuteqarneq annerpaaq pineqassaaq, Aaja Chemnitz Larsen oqarpoq.
Ministeriap nunanut allanut tunngasunut ministeriamut ilaasoq takorloorpaa, taanna Issittumut aamma Kalaallit Nunaannut tunngasunut akimut suleqatigiiffiussalluni.
Nunatta Qitornai qinersisartunik ataatsimiititsinermut peqataanngilaq.