inuit
Issittumu aningaasaqarnermik suleqatigiinneq ICC-p nukittorsarusuppaa
ICC-p tulliani ataatsimeersualerpat 'Inuit – Issittoq uagut pilluta' qulequtarineqassaaq
Aningaasaqarneq pillugu qanimut suleqatigiinneruneq, tassa Inuit Circumpolar Councilip (ICC) ukiuni tulliuttuni oqaluuserisagassaat.
Qulequtaq taanna 2018-imi upernaap ingerlanerani Alaskami ataatsimeersuarnermi oqaluuserineqassaaq.
Sapaatip akunnerata kingulliup naanerani ICC-p siulersuisuuneri Nunatsinneersut, Canadameersut, Alaskameersut Tjukotkameersullu Labradorimi illoqarfimmi Nainimi ataatsimiipput. Ataatsimiinnermi pingaarnertut 2018-imi ataatsimeersuarnissaq piareersarlugu aallartisarneqarpoq, tassanilu 'Inuit – Issittoq uagut pilluta' qulequtarineqarpoq.
- Ataatsimeersuarnitsinni qulequttat soorunami Inuit isumaat naapertorlugit ingerlanneqassapput, pineqartullu Inuit misilittagaat siunertaallu naapertorlugit aalajangersaaffigineqassallutik, Hjalmar Dahl, ICC Kalaallit Nunaata siulittaasua ilisimatitsinermini oqarpoq.
Aammattaaq aalajangiiffigineqarpoq Ataatsimeersuarnermi Inuit nunaaninngaanneersut politikkerit aggersarlugit oqalugiartinneqassasut.