Issittumi suleqatigiinneq isornartorsioraa

Vittus Qujaukitsoq Amerikamiunut kiinneraarpoq, kisianni Canadami ataasinngornermi oqalugiarnermini ICC aamma Issittumi Siunnersuisoqatigiit Nunatsinnut suliniuteqarnerat isornartorsiorpaa.

NunatsiaqOnline maanna Arctic Circle Forumimi Quebecimi oqalugiarneranit takisuumik eqikkaanermik saqqummiussivoq, tassanilu atuarneqarsinnaavoq, Vittus Qujaukitsoq Issittumi suleqatigisat Nunarput pillugu suliniutaannut qularisaqartoq, kisianni ukiut sorsuffiusut nalaanni USA-mik suleqateqarneq piffissaq Kalaallit Nunaannut pitsaasuunerarpaa.

- Qujaukitsup piffissaq 1941-p aamma 1945-p akornat pitsaasuunerarlugu oqaluuseraa, taamani Kalaallit Nunaat USA-mit illersorneqalermat, NunatsiaqOnline allappoq, Vittus Qujaukitsorlu ima issuarlugu.

- Amerikamiut Kalaallit Nunaanniinnerat piffissatut neriulluarnartutut eqqaamaneqassaaq.

Atuaruk: Vittusip Danmark USA-lu sioorasaarpai

Vittus Qujaukitsup inussiarnisaarluni Amerikamiut naalakkersuisussaat Donald Trumpimik aamma uuliasiortut pisortaat Rex Tillersonimik siuttoqartut assaminik isaassiffiginerani, Inuussutissarsiornermut, Suliffeqarnermut, Niuernermut, Nukissiornermut aamma Nunanut allanut tunngasunut naalakkersuisup Issittumi Siunnersuisoqatigiit aamma ICC oqalugiaammini isornartorsiorpai.

- ICC uuliamik aamma gassimik piiaanermik ineriartortitsinermut pisoqqamik isiginnittaaseqarpoq, Kalaallit Nunaatalu soqutigisaanik aqutsinini iluatsinngitsoorpaa, oqalugiarnermini taama issuarneqarpoq.

Ikerinnaasiortumik aalisarneq Nunatsinni maannakkorpiaq pingaarnerpaallunilu isertitsissutaanerpaasoq, oqalugiartarfimmit aamma naqissuserpaa.

- Kisianni tamanna nunamut namminersortumut atatitsisutut naammanngilaq, Kalaallit Nunaat aamma inuussutissarsiutinik allanik pilersitsisariaqarneranik tamanna isumaqarpoq, soorlu pisuussutinik piiaaneq aamma takornariaqarneq, Qujaukitsoq oqarpoq.

Atuaruk: Namminiilivinneq ima aningaasalersorneqassaaq

Namminersulivinnissamillu takorluugaqarneq taamaatinngilluinnartoq, taassuma aamma naqissuserpaa.

- Kalaallit Nunaat namminersulivikkiartulerpoq. Nunap ineriartortinneqarnerata qeqqaniippugut, Vittus Qujaukitsoq Arctic Circle Forumimi peqataasunut oqarpoq.

Atuaruk: Vittus pillugu Løkke ernumassuteqanngitsoq