Issittumi suleqatigiinneq folketingip nukittorsarpaa
Folketingi issittoq pillugu aallartitanik pilersitsivoq. Issittumi avannarlermit ilaasortaatitaasut aallartitani inissaqartinneqarput.
Issittoq pillugu suleqatigiissitaq maanna atuuttoq folketingimut qinersisoqareerpat issittoq pillugu aallartitatut pilersinneqassaaq. Folketingimilu taamaasiorneq issittoq pillugu suliaqarnerup qaffassarneqarneratut isigineqartariaqartoq, Nunat Avannarliit pillugit Siunnersuisoqatigiinni aallartitani, siulittaasoq, Henrik Dam Kristensen (S) isumaqarfigineqarpoq.
- Issittumi suliat pillugit pitsanngoriaaterujussuuvoq, Sermitsiaq.AG-mut oqarpoq.
Issittumi suleqatigiissitaq maannamut Nunat Avannarliit pillugit Siunnersuisoqatigiit ataanniissimagaluarpoq. Aallartitaqarfittulli ingerlalerpat Folketingip ataani inissisimalissaaq, taamaaliornermilu aningaasaliissutit marloriaatinngortinneqassallutik.
Aallartitanut ilaasortaasussat, nunanut allanut, illersornissamut, inatsisinut, kalaallit nunaannut, savalimmiunullu ataatsimiititaliamit, kiisalu Nunat Avannarliit pillugit Siunnersuisoqatigiinnit toqqarneqassapput, ataatsimiititaliat tamarmik marlunnik toqqaassallutik. Taamaasiornerlu Folketingimi sulinermi nutaarluinnaavoq.
- Ataatsimiititaliat pineqartut tamarmik issittoq pillugu suliaqarsimapput. Aallartitaqalerutta sulineq ataqatigiissaarluagaanerulissaaq, Henrik Dam Kristensen (S) oqarpoq.
- Tamatta isumaqatigiissutigisinnaavarput issittoq pingaaruteqarneruleriartortoq; Naalagaaffeqatigiinnerup iluani aammali nunat tamalaat akornanni. Tamanna periarfissanik nutaanik aammali unammilligassanik nutaanik malitseqarpoq.
Aallartitaqalernissaq pillugu siunnersuut Nunat Avannarliit pillugit Siunnersuisoqatigiinnit saqqummiunneqaqqaarmat, nunanit avannarlernit ilaasortaatitat sunniutaarunnissaat aarleqqutigalugu, Aaja Chemnitz Larsen (IA) apeqqusiisimagaluarpoq. Siunnersuummili maanna allassimalerpoq Kalaallit Nunaannit Savalimmiuniillu aallartitanik ilaasortaatitaqarneq “inissaminiittoq”.
- Suleriutsip aaqqissuunneratigut politikkikkut akuersaarnerup nukittulluinnarnera takutinneqarpoq, taamaattoqarnissaami partiit tamarmik tapersersorpaat, Henrik Dam Kristensen (S) oqarpoq.