Issittumi Siunnersuisoqatigiit ineriartornerat pillugu ernumassuteqartoqartoq
Ane Lone Bagger Issittumi Siunnersuisoqatigiit ukiumoortumik ataatsimiinnermi ataatsimut siunnerfeqarnissamik isumaqatigiissuteqarsimannginnerannik ernummateqarpoq
Issittup pissanganartorsiorfiungaluttuinnarfiani aatsaat taamak pingaaruteqartigaaq, Issittumi Siunnersuisoqatigiit suleqatigiinnermik qitiutitsilluinnarlutik nunanit tamalaaneersunit oqallittarfiunissaat. Isuma tamanna Nunanut Allanut Naalakkersuisup Ane Lone Baggerip (S) nunanut allanut tunngasutigut ingerlatsineq pillugu nassuiaammik ullumi Inatsartunut saqqummiussigami erseqqissaaffigaa.
Taamaammat kingullermik ataatsimeeqatigiittoqarmat ataatsimut siunnerfissamik suliaqarniarnermik USA-p mattussinera nuannersumik takutitsinngilaq, tassaTrumpip allaffeqarfianit sila pillugu immikkoortortaq isumaqatigineqanngimmat.
- Ukioq manna ministerit Rovaniemimi ataatsimiinnerisa takutippaat nunami issittumi unamminartut suli annertusiartuinnartut. Siunnersuisoqatigiit ukiuni 23-ni oqaluttuassartaani siullermeertumik ukioq manna ministerit ataatsimiinneranniit ataatsimoorussamik nalunaaruteqartoqanngilaq. Tamatumunnga nalunaarummi oqaasertat pillugit isumaqatigiissinnaannginneq pissutaavoq. Pingaartumik silap pissusaa pillugu politikkimi isumaqatigiinngitsoqarpoq. Ataatsimut nalunaarummik atsiortoqannginnera manna tikillugu periutsimik unioqqutitsineruvoq, Ane Lone Bagger (S) nunanut allanut tunngasutigut ingerlatsineq pillugu nalunaarummi allappoq.
- Tamanna piujuartitsinermik tunngaveqarluni ineriartorneq, avatangiisinik aqutsineq aamma Issittumi inuit pillugit ineriartorneq pillugit siunnersuisoqatigiinni eqqissisimasumik suleqatigiinnerannut pingaarpoq.
Pompeop oqalugiaataa
Rovaniemimi ataatsimiinneq aamma immikkuullarissutitaqarpoq, tassanimi nunanut allanut ministerip Mike Pompeop Rusland Kinalu sakkortuumik saassuppai. Oqalugiaat taanna aamma Ane Lone Baggerimut (S) eqqarsalersitsivoq.
- Sakkutooqarnermut sorsunnermullu tunngasunik sammisanik arlalinnik saqqummiussivoq. Sammisat Issittumi Siunnersuisoqatigiinni manna tikillugu sammineqarsimanngitsut. Issittumi Siunnersuisoqatigiinninngaanniit allaanerusumi nunani tamalaani oqalliffinni allani sillimaniarnermut politikki oqallisigineqartariaqartoq naliliivunga. Issittumi Siunnersuisoqatigiit naapittarfiunerata annaannginnissaa sianigeqqissaartariaqarparput, tassani ukiuni kingullerni 23-ni Issittumi nunat akornanni eqqissisimasumik suleqatigiinnerup qulakkeerneqarnissaanut nunani tamalaani oqalliffiusoq.
- Maannakkut piffissami Issittup arlalitsigut allanngulernerani nunarsuup immikkoortuani tassani suleqatigiinnerup allanngortinnginnissaa pingaarluinnarpoq.