Issittumi Sakkutooqarfiup Canadamik suleqateqarneq pitsanngorsaaffigaa
Misilittakkanik avitseqatigiittarnikkut ataatsimoorlunilu sungiusaqatigiittarnikkut Issittumi Sakkutooqarfiup Canadallu sineriaani nakkutilliisartut suleqatigiinnerat pitsanngorsaaffigineqassaaq. Suleqatigiinnikkut avatangiisitigut ajornartorsiuteqarnermik pinngortitamilu ajunaarnersuaqartoqarneranik isumaginnittarneq pitsaanerulersinneqassaaq, sakkutooqarfimmit oqaatigineqarpoq.
Issittumi Sakkutooqarfik Canadallu sineriaani nakkutilliisut Issittumi Atlantikullu Avannaanni assigiinnik suliaqartarput, soorlu annaassiniarnerit, aalisarnermik nakkutilliineq allatigullu nakkutilliineq.
Taamaammat suliffeqarfiit taakku marluullutik misilittakkaminnik avitseqatigiittarnissaq pillugu siunnerfeqarnermik atsioqatigiissimapput.
- Canadap sineriaani nakkutilliisunik suleqateqarnermi siunnerfeqaqatigiinneq aamma Issittumi nakkutilliisarnerup suleqatigiinnerullu pitsanngorsaaffigineqarniarnera pingaaruteqarluinnarput, Issittup Sakkutooqarfiani generalmajor Kim Jesper Jørgensen oqarpoq.
Issittumi Sakkutooqarfimmit oqaatigineqarpoq, suleqatigiilersut ilisimasanik misilittakkanillu avitseqatigiittarnissaq iluaqutitaqartussatut isigigaat, pissutigalugu Issittumi suliaqartarneq immikkuullarissuummat, tassa issersuarmi, kitaata imartaata sikoqartarnerani sikorsuaqartarneranilu suliaqartarneq aamma killilimmik attaveqatigiissinnaasarneq immikkuullarissuummata.
Pinngortitami ajunaarnersuit pitsaanerusumik isumagineqartassasut
- Kalaallit Nunaanni innuttaasut suleqatigiittoqarnera malugisassavaat, Issittumi Sakkutooqarfiup Kalaallit Nunaata Canadallu akornanni imartami annaassiniarnissamut aamma avatangiisitigut ajornartorsiortoqartillugu pinngortitamilu ajunaarnersuaqartillugu isumaginninnissamut ataqatigiissaarisarnermik pitsaanerusumik takunnissinnaalerneratigut misilittagaqalerneratigullu, Issittumi SakkutooqarfikSermitsiaq.AG-mut allakkatigut akissuteqarnermini ilisimatitsivoq.
Issittumi Sakkutooqarfik Canadamik suleqateqarnini pissutigalugu sulissami ilaanik naammassinninnerusaleruni suliassanut allanut nukissaqarnerulissaaq.
Canadap sineriaani nakkutilliisunik suleqateqartoqalerpoq, Issittumi Sakkutooqarfik septembarip qaammataani allamik suleqateqalermat. Tassa issittumi atlantikullu avannaani nakkutilliisarnerup nukittorsarneqarnissaa pillugu Natomi imarsiortut qullersaqarfiat suleqatigilermagu.