Skip to main content

Issittumi Sakkutooqarfik: Nanoq angummik ataatsimik saassussisimasoq

Filmiliortartut pingasut Tunumi Daneborg Stationimi ataasinngormat unnuakkut sininneranni nanoq saassussisimavoq. Angutit ilaat ataaseq assammigut kiitissimasoq, Issittumi Sakkutooqarfik ilisimatitsivoq.

Filmiliortartut pingasut ataasinngormat unnuakkut Tunumi Danborg Stationip eqqaani 400 meterisut ungasitsigisumi sinitsillutik nuannerpallaanngitsumik pulaartoqarsimapput.

- Nanoq igalaakkut ammasukkut iserniarsarisoq inuit taakku pingasut itersimapput. Nannup sassussilluni angutip assaa saamerleq kiisimavaa. Angutip nillialluni ilani kalerrissimavai, taakku ikiuunnerisigut nannup kiisani iperarsimavaa, Issittumi Sakkutooqarfik facebookikkut ilisimatitsivoq.

Assimi qulaaniittumi igalaaq nannup iserfia aserorsimasoq takuneqarsinnaavoq.

Nanoq aallaqqaammut unikkaluarsimavoq, saassusseqqissimallunili. Filmiliortartulli aallaat kalerrisaarutaasartoq atorlugu qimaatissimavaat.

Islandimut aallarukkasuarneqartoq

Angut nannumit kiineqarsimasoq Alapernaarsuisunit Siriusimeersunit aaneqarsimavoq. Taakku nalilersimavaat, angut sukumiinerusumik katsorsarneqartariaqartoq.

- Alapernaarsuisut Siriusimeersut angut Station Daneborgimi nakorsiartarfeeqqamukaassimavaat. Tassani Siriusip nakorsaa Danmarkimiittoq ikiorsiullugu suliarineqarsimavoq.

Siriusimeersulli ikiuunnerat naammassimanngilaq. Angut suli ikiorserneqartariaqarmat aalajangersimapput, Islandmi Akureyrimi suliareqqitassanngorlugu aallarukkasuarneqassasoq.

Nanoq arlaleriarluni utertarsimasoq

Siriusikkormiut unnuaq taanna illuaqqamik misissuisimanerisa takutippaat, nanoq igalaamik ammasumik nassaartinnani igalaanik arlalinnik ammaaniartarsimasoq. Filmiliortartullu marluk kisinngorussimasut marlunngormat ullaakkut nalunaarutigaat, nanoq uteqqilluni tungiminnukartoq.

- Siriusikkormiut qisuariapallallutik nanoq ilisimatusartut illuaraannut apuutsinnagu qimaateqqissimavaat.

Marlunngornerup unnuaani nalunaaqutaq marlunut nanoq ilisimatusartut illuaraannut iserniarsareqqissimavoq. Tamatumuuna igalaamik ataatsimik aseruisimalluni. Nanorli iluaqqamut anngutsinnagu filmiliortut marluullutik qimaatissimavaat, Issittumi Sakkutooqarfik ilisimatitsivoq.

´Nanoq ajornartorsiutaasoq´

Issittumi Sakkutooqarfiup pisimasoq Namminersorlutik Oqartussanut nalunaarutigisimavaat, nanorlu ’ajornartorsiutaasutut´ nalilerneqarsimavoq. Tassa imatut paasillugu, nanoq uteqqissagaluarpat toqunneqarsinnaatitaavoq.

Nanoq pineqartoq siusinnerusukkut tallimariarluni takkuttarsimasutut ilisimaneqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER