Issittumi Sakkutooqarfik toqusoqarneranit eqqungaasoq
32-nik ukiullip kaptajnløjtnantip Anders Kjerri Rasmussenip, Nuummi angerlarsimaffimmi silataani toqunerata kingorna, Issittumi Sakkutooqarfimmi (Arktisk Kommando) suleqataasut attortisimapput.
Kaptajnløjtnantip inuunera annaanneqarsinnaasimanngilaq, naak suleqataasut sanianilu najugaqartut piaartumik ikiueqqaarnermik ikiuussimagaluartut. Anders Kjerri Rasmussen nuliaqarpoq paneqarlunilu.
- Suleqataasut ikinngutaasullu Andersip naggammik angalannginnerani Nuummi mittarfimmi kateripput. Anders Kastrupimi ilaquttaminit, ikinngutiminit suleqatiminillu qaniorneqarpoq. Angalanermi Anders ilaquttaminit qanigisaminit ingiaqatigineqarpoq, Issittumi Sakkutooqarfik Facebookimini ilisimatitsivoq.
Sakkutuut imarsiortut naalagaat ataqqineqartoq
- Anders Issittumi Sakkutooqarfimmi septembarip aallaqqaataani 2018-imi sulilerpoq, tassani pingaarnertut suliassaralugit imaani suliassat pilersaarusiornissai pingaartumik immami avatangiisinut tunngatillugit suliassat. Anders sakkutuut imarsiortut naalagaatut pikkorilluinnartutut ataqqineqartutullu eqqaamaneqassaaq. Andersip sivikikkaluamik inuunermini tunniussaqarluarsimanera eqqaamaneqassaaq. Anders pikkorissuuvoq, inunnut attaveqallaqqissuulluni – taamaattumillu naalakkatut ikinngutitullu nuannarineqarluartuulluni, Issittumi Sakkutooqarfik allappoq.
- Siusippallaamik toqunera tamatta attortissutigaarput, sakkutooqarfik allappoq.