Issittumi Sakkutooqarfik Nato-mik nutaamik suleqateqalersoq
Isumaqatigiissut nutaaq aqqutigalugu, Natop imarsiornermut qullersaqarfia paasissutissanik pitsaanerusumik avitseqatigineqartalissaaq aamma issittumi atlantikullu avannaani nakkutilliisarneq pitsaanerulersinneqassaaq.
Issittumi Sakkutooqarfiup aamma Natop imarsiornermut qullersaqarfiata, MARCOM, isumaqatigiissutaat Issittumi Sakkutooqarfimmi pisortap Kim J. Jørgensenip sapaatip akunnerani kingullermi atsiorpaa.
Iaumaqatigiissutitigut qulakkeerneqarpoq, sakkutooqarfiit taakku marluk ulluinnarni suliatigut suleqatigiittarnissaat, ilaatigut issittup atlantikullu avannaata nakkutigineqarneranik pitsaanerulersitsisussaq, sakkutooqarfik Facebookini aqqutigalugu ilisimatitsivoq.
Issittumi Sakkutooqarfiup Sermitsiaq.AG-mut allakkatigut oqaaseqaateqarnermini erseqqissaatigaa, isumaqatigiissuteqarnermi pingaarnertut anguniarneqartoq, paasissutissanik pitsaanerusumik avitseqatigiittalernissaq aamma isumalluutinik pitsaanerusumik atuisalernissaq:
- Suleqatigiilernitta nassataanik, suliarineqartut tamatsinnut soqutiginartuusut pillugit paasissutissanik qanoq isumaginnittassanerluta qanorlu tunniussisassanerluta isumaqatigiissuteqarpugut.
Akisussaaffeqarfiit imminnut attuumassuteqartut
- Assersuutigalugu isumaqatigiissutigaarput Issittumi Sakkutooqarfiup umiarsuaataa nakkutigisartakkaminit allat nakkutigisartagaannut toqqaannartumik pippat, paasissutissat tunniunneqartussat pillugit kimut sianertoqassanersoq qanorpiarlu allattoqartassanersoq, Issittumi Sakkutooqarfik allappoq.
Issittumi Sakkutooqarfimmi pisortap Kim J. Jørgensenip isumaqatigiissut nutaaq, Natop imarsiortuinik suleqateqarnermik pitsanngorsaasussaq nuannaarutiginerarpaa:
- Akisussaaffeqarfivut imminnut attuumassuteqarput, pissusissamisuuginnarporlu sumiiffimmi umiarsuit angallannerannik tamakkiisumik paasisaqassagutta immitsinnut ikioqatigiinnissarput, Kim J. Jørgensen oqarpoq.
Annaassiniarnissamut pitsaanerusumik periarfissaqartoqalissasoq
Isumaqatigiissut Kalaallit Nunaanni innuttaasunut imatorsuaq kinguneqassanngilaq, isumalluutinilli pitsaanerusumik atuisalernissaq siunertaammat, Issittumi Sakkutooqarfiup isumalluutaasa ilaat sakkutooqarfiup suliassaanut allanut atorneqarsinnaalissapput:
- Taamaalilluni suliassat allat, soorlu imaatigut angallattunik nakkutilliinissat, imaani avatangiisinik nakkutilliinissat, ilisimatusartunut ikiorsiinissat, najukkami inuiaqatigiinnut ikiorsiinissat il. il. pitsaanerusumik aaqqiissuteqarfigineqarsinnaanngussapput.
- Aamma sumiiffimmi angallattunik pitsaanerusumik takunnissinnaalerneq annaassiniarnissamut sumiiffimmilu assigusumik arlaannik ikiorsiinissamut pitsaanerusumik periarfissaqalissiissaaq, Issittumi Sakkutooqarfik Sermitsiaq.AG-mut ilisimatitsivoq.