medier

Issittumi online-mi tusagassiorfik nutaaq

Issittoq onlinemi nutaamik tusagassiorfittaarpoq. Tusagassaqartitsivik Sermitsiaq.AG tusagassiorfimmik tuluttuumik nutaamik saqqummersitsivoq: The Arctic Journal (www.arcticjournal.com)

Arctic Jounal allaaserisanik issittumut tunngassutilinnik imaqarpoq

Suliniut ilaatigut Grønlandsbankens Erhvervsfond-imit tapiiffigineqarsimavoq, tusagassaqartitsivimmilu tuniniaanermut ineriartortitsinermullu immikkoortoqarfimmit ineriartortinneqarsimalluni, web-imik ilusilersuinermillu ineriartortitsinermi pikkorinnerpaat suleqatigalugit. Ilaatigut Rabotnik, taassumalu aamma ukioq manna siusinnerusukkut Nunatsinni website-t iserfigineqarnersaat www.Sermitsiaq.AG ineriartorteqataaffigisimavaa.
Nunarsuup immikkoortuani tusagassiorneq nunarsuarmut sammitillugu
Tusagassaqartitsiviup pisortaa Poul Krarup issittumi tusagassiorfimmik suliniuteqartuuvoq, The Arctic Journal-imullu isumassarsiaq imatut nassuiarpaa: "Nunarsuup immikkoortua issittoq politikkikkut, aningaasarsiornikkut inuussutissarsiornikkullu pingaaruteqaleraluttuinnarpoq. The Arctic Journal-ikkut qulakkeerniarparput siunissami nunarsuup immikkoortuani paasissutissiinerup nutaarsiassaqartitsinerullu ilusilersorneqarnerani Kalaallit Nunaata tusagassaqartitsinikkut peqataanissaa. The Arctic Journal naatsumik oqaatigalugu tassaavoq nunarsuup immikkoortuani tusagassiorfik nunarsuarmut tamarmut sammisoq".
Ulluinnarni aaqqissuisuupput Kevin McGwin, Ray Weaver aamma Nicolai Jacobsen.
Aqqutit nutaat
The Arctic Journal-imik suliniut aamma nutaaliorneruvoq, tsuagassaqartitsinermi nalinginnaasumik sulinermut sanilliullugu. Sammisaqarfik tatineqaleraluttuinnarpoq, niuerfinnillu nutaanik nassaarniassaagut, piffissaq ungasinnerusoq isigalugu tusagassaqartitsiviup pingaarnerusumik suliaanik aningaasaliisussanik: nunatsinni tusagassiorneq aviisillu sapaatip akunnikkaartumik saqqummersartut.
Ilaatigut tusagassiorneq pigineqareersoq atortariaqarparput, tuluttullu atuartartunut amerlanerusunut siammarterlugit. The Arctic Journal-illu imarisai annertunerusumik sunniuteqassapput Issittumi nunarsuup immikkoortua akimorlugu allaaserisatigut attuumassutilitsigut aaqquissuisut tuluttut oqaasillit suleqatigalugit.
Atuartartunit tusagaqarusuppugut
The Arctic Journal-imi oqallissaarutit tunngaviit pingaarutillit ilagaat, tusagassaqartitsiviullu soqutigisaraa inuussutissarsiortut, politikerit, sunniuteqarniartartut, ilinniagaqartut oqallittullu tusagaqarfigissallugit, The Arctic Journal-imi tuluttut oqallisissianik peqataarusuttut.
Oqallisissiat uunga nassiunneqassapput nicolai@arcticjournal.com, tassanissaaq The Arctic Journal pillugu paasissutissat annertunerusut pissarsiarineqarsinnaapput.

Powered by Labrador CMS