Issittumi nunat politikeriisa ataatsimiititaliaat: Aaja siulittaasutut ingerlaqqippoq
Issittumi nunat inatsisartuini ilaasortaasut ataatsimiititaliaanni Aaja Chemnitz Larsen siulittaasutut ingerlaqqissasoq, sisamanngornermi ataatsimiinnermi aalajangerneqarpoq. Ataatsimiititaliaq aamma aalajangerpoq russit ilaasortaatitaat peqataatinnagit suliat ilai nanginneqassasut.
Nunatta folketingimi ilaasortaatitaa, Aaja Chemnitz Larsen, Issittumi nunat inatsisartuini ilaasortaatitat ataatsimiititaliaanni (Standing Comittee of Parliamentarians of the Arctic Region, SCPAR) 2024-p tungaanut siulittaasutut ingerlaqqissasoq sisamanngornermi 12. maj aalajangerneqarpoq.
Nunat issittumiittut, Canada, Finland, Island, Norge, Sverige, USA aamma Kalaallit Nunaat (Danmark) SCPAR-imi ilaasortaatitaqartut sisamanngornermi internet aqqutigalugu persuarsiorpalaanngitsumik ataatsimiipput. Ataatsimiinnermi aamma aalajangerneqarpoq USA-p senatimi ilaasortaq Lisa Murkowski siulittaasup tulliatut ingerlaqqissasoq Folketingimilu siunnersortit pisortaat Peder H. Pedersen generalsekretæritut ingerlaqqissasoq.
- Ukrainemi sorsunneq pissutigalugu SCPAR-ip suliai pisortatigoortumik unitsikkallarneqarnikuupput. Sulialli nangeqqinnissaannut russit ilaasortaatitai maanna peqataatinneqassanngillat, IA Folketingimi tusagassiorfinnut nalunaaruteqarluni ilisimatitsivoq.
- Siulittaasup ingerlaqqinnissaanut aalajangerneq nunat peqataatitaqartut arfineq-marluusuni tamanit isumaqatigineqarpoq.
Nuummi ataatsimeersuartoqassaaq
SCPAR Nuummi augustimi ataatsimeersuartitsissamaarpoq.
’Arctic Parliamentarian Summit’ tassaavoq Ruslandip Ukrainemut februarimi tiguaaneraniit ataatsimiititaliami pisussaq annertooq siulleq.
- Naalagaaffiit ilaasortaatitaqartut isumaqatigiipput sorsunneq pissutigalugu suliat piffissami aalajagingaanngitsumi uninngatiinnarneqarsinnaanngitsut. Assersuutigalugu silap pissusaata allanngoriartornerata sorsunnersuup soraarnissaa utaqqinavianngilaa. Taamaammat aalajangerparput suliat ilaat aallarteqqinneqassasut, Nuummilu pisussaq Arctic Parlamentarian Summit ingerlanneqassasoq, SCPAR ilisimatitsivoq.
Nunat arfineq-marluk peqataatitaqartut aalajangerputtaaq Rusland ilisimatissallugu russit ilaasortaatitaat peqataatinnagit suliat nangeqqinneqalersut.
Arctic Parliamentarian Summitip ingerlanneqarnissaanut Folketingimit 1,9 milliuunit koruuninik aningaasaliisoqarnikuuvoq.