Issittumi inuiaqatigiit isumannaarnissaannut inuusuttut sulissuteqassapput

Inuusuttut siunissami Alaskami, Canadami Kalaallit Nunaannilu aqutsisussat 21-t, Issittumi inuiaqatigiit akiuussinnaassuseqarnissaannik qulakkeerinninnissamik suliaqartussatut toqqarneqarput.

The Arctic Resilient Communities Youth Fellowship (ARC-YF) inuusuttunik aqutsisunik 21-nik Alaskamit, Canadamit aamma Kalaallit Nunaannit 18-it aamma 30-t akornanni ukiulinnik, ilisimasalinnik suleqateqarlutik najukkaminni inuiaqatigiinnut nunallu immikkoortuinut siunissamut piareersaasussanik toqqaavoq.

Aqutsisunik nutaanik Issittumi inuiaqatigiinni akiuussinnaassuseqarnissamik suliaqartussat tunniusimanissaannik piujuartitsisumik ineriartortitsinerup siuarsaaffigineqarnissaanut ARC-YF ilusilersugaavoq.

- Institutip suleqativut inuusuttullu taakku aqutsisut piujuartitsisumik ineriartortitsinissamut aamma avannaani tamani Issittumi inuiaqatigiit akiuussinnaassuseqarnerisigut atugarissaarnissamut periarfissat siuarsarnissaannut suleqatiginissaat tulluusimaarpugut, Institut for Nordenimi siulersuisunut siulittaasoq, Jon Isaacs taama oqarpoq.

Ilinniartut oqallinnernut peqataassapput aamma inuiaqatigiinnik tunngaveqartunik suliniutinik ineriartortitsissallutik, makku sammineqassallutik: silap pissusiata allanngoriartornera, uumassusillit assigiinngissitaarnerat, mingutsitsinngitsumik nukissiorneq, akisussaassuseqartumik pisuussutinik attaveqaatinillu ineriartortitsineq, nunaqavissut ilisimasaat aamma issittumi naalakkersuinermik ingerlatsineq, tamakku internetikkut isumasioqatigiinnikkut aamma workshopertitsinikkut Alaskami, Canadami Kalaallit Nunaannilu pissapput.

Marsimi Alaskami ataatsimiissasut

2023 ARC-YF-gruppimut ilaasut, 18-init 30-t tikillugit ukiullit ilisimasalinnik arlalinnik suleqateqassapput.

Kalaallit Nunaannit gruppimut uku ilaatinneqarput:

  • Juliane Aronsen Kangaatsiamit, Kalaallit Nunaat, maanna Sisimiuni najugaqartoq, Nordatlantiske Gymnasieklassemi ilinniartoq.
  • Miyuki Daorana kalaallinit/japanimiunit kingoqqisoq, Nuummi inunngortoq, Londonimi ilinniarlunilu najugaqartoq.
  • Edna Lyberth Maniitsumeersoq Danmarks Tekniske Universitetimi aalisarnermi ingeniøritut ilinniartoq.
  • Kirsten Petersen Sisimiuneersoq, Nordatlantiske gymnasieklassemi ilinniartoq kulturimik soqutigisaqartoq
  • Nivi Rosing Nuummeersoq, maanna Nunavumi Sivuniksavutimiittoq, Ottawa Canada
  • Freyja Stefansdottir Kujallermeersoq, Isortumi tuttuuteqarfimmi sulisoq.
  • Iluuna Sørensen Nuummeersoq Aalborg Universitetimi Københavnimi ilinniartoq.

Workshoperneq siulleq aqutsisut naapiffissaat Alaskami 23.-28. marts pisussatut pilersaarutigineqarpoq. Ilinniartut tamarmik Utqiagvik-mut aamma Anchoragemut aallassapput, najukkami pissutsit misigiartorlugit, Issittumilu aqutsisut nunap inoqqaavisa kattuffianneersut, suliffeqarfiit naalakkersuisullu naapinneqassallutik.

- Alaskami suliffeqarfiit kattuffiillu Anchoragemi aamma Utqiagvik-mi workshopernernik marsimi ingerlatsinissamik suleqatigaagut, ARC-YF-imi aaqqissuisoq Francesca Bray oqarpoq.

Powered by Labrador CMS