Ingeniørit
Issittumi ingeniørit 50-issaat Artek-imit naammasseqqammerpoq
Ukiullu affaata tulliuttup ingerlanerani issittumi ingeniøritut ilinniagaqartut suli qulit soraarummiissapput, Center for Arktisk Teknologi paasissutissiivoq
Tallimanngormat aggustip 22-anni 2014 Jakob Malmskovip aamma Bjarke Raakjær Jensenip diplom-itut soraarummeerutitut suliniutertik torrallallugu illersorpaat. Inuusuttut issittumi ingeniørinngortut taakkua marluk Sisimiuni Artek-imit issittumi ingeniøritut soraarummeertut 49-ussaralugulu 50-issaraat.
Issittumi ingeniørit piumaneqartorujussuupput, taamaattumillu soraarummeernermik kingorna suliffissarsinissaminnik ajornartorsiuteqassanatik.
Taamaasilluni Bjarke Raakjær Jensen Norgemi Tromsømi Multiconsult-imi sulilereersimavoq. Jakob Malmskov DTU-mi sanaartornermi teknologi-mi kandidat-inngorniarluni ingerlaqqippoq, aatsaat tamatuma kingorna piginnaasani sulisartutut atorniarlugit. Taamatut tusagassiorfinnut nalunaarutikkut paasissutissiivoq Center for Arktisk Teknolgi, Danmarks Tekniske Universitetip ataaniittoq. Center for Arktisk Teknolgi-mi ilinniagaqarneq Sisimiuni aallartinneqartarpoq.
Issittumi ingeniøritut ilinniagaqartut siulliit 2005-imi Artek-imit soraarummeerput. Issittumi ingeniørinngorsimasut 50-it affai kalaaliupput, tamarmillu, ataaseq kisimi pinnani, Kalaallit Nunaanni sulilersimanngikkunik civilingeniør-itut kandidat-itut ingerlaqqiffimmut ingerlaqqipput, Center for Arktisk Teknologimi immikkoortoqarfimmi pisortaq Lisbeth M. Ottosen paasissutissiivoq.
Suli amerlanerusunik issittumi ingeniørinngortussaqarpoq. Ukiup affaata tulliuttup ingerlanerinnaani ilinniagaqartut suli qulit ilinniakkaminnik naammassinnissapput. Septembarip aallaqqaataani holdi nutaaq 23-nik ilinniartulik Sisimiuni Center for Arktisk Teknologimi aallartissaspput, Lisbeth M. Ottosen paasissutissiivoq.