Issittumi inatsisartuni ilaasortat Nuummi ataatsimeersualerput

Folketingimi ilaasortap Aaja Chemnitzip nunat issittut inatsisartuini ilaasortat 24-it Issittoq pillugu nunat tamalaat nunatsinni ataatsimeersuarnissaannut qaaqquai. Ataatsimeersuarneq Nuummi 11.-13. september ingerlanneqassaaq.

Den Arktiske Parlamentariker Komitemi siulittaasup Aaja Chemnitz Larsenip issittumi nunat assigiinngitsuni politikerit Nuummi septemberimi ataatsimeersuarnissamut qaaqquai.

Issittumi nunat inatsisartuini ilaasortat 24-it Issittoq pillugu nunatsinni 11.-13. septmberimi ataatsimeersuarnissamut qaaqquneqarput. Folketingimi ilaasortaq Aaja Chemnitz ataatsimeersuarnermut Nuummi ingerlanneqartussamut qaaqqusisuuvoq.

Aaja Chemnitz tusagassiorfinnut nalunaarutimini ilisimatitsivoq politikerit innuttaasullu soqutiginnittut ataatsimeersuarnermi malinnaasinnaasut.

- Ukrainemi sorsunnerup Issittumi suleqatigiinnissaq unammillernartittarsimavaa, taamaattorli aamma takutillugu suleqatigiinnissaq qanoq pingaaruteqartiginersoq. Naapinnissarput maanna pingaaruteqartorujussuuvoq, Aaja Chemnitz oqarpoq nangillunilu:

- Issittumi Siunnersuisooqatigiit suliaat unitsikkallarneqarnikuupput, uagulli Issittumi Inatsisartuni ilaasortaasugut Rusland minillugu naapinniarpugut. Issittumi aalakkersuisunut silap pissusaa, nunap inoqqaavi aamma Issittumi annertunerusumik inuussutissarsiulernissamut innersuutissanik pissarsinissaq anguniarparput.

Nunat arfineq-marluk peqataatitaqassapput

Issittumiittut nunat arfineq-pingasut, Canada, Finland, Island, Norge, Sverige, USA, Rusland aamma Grønland (Danmark) Den Arktiske Parlamentariker Komitemi ilaasortaatitaqarput.

Aaja Chemnitz komitemi siulittaasutut qinerneqaqqissimavoq, Folketingillu Præsidiumianit 1,9 milliuunit koruuninik aningaasaliiffigineqarsimalluni nunat assigiinngitsut issittumeersut inatsisartuini ilaasortat ataatsimeersuartinnissaanut.

- Nuummi naalakkersuisuunerit ataatsimiinnissaannut qilanaarpunga. Naalakkersuisuunerit ataatsimiinnissaat siulleq pissaaq. Uannut sammisat allat aamma qaqinnissai pingaaruteqarput, soorlu Issittumi demokratii, Issittumi arnanik aqutsisoqarneq aamma Issittumi aningaasaqarnikkut ineriartortitsineq, tamanut ammasumik aamma oqallitsitsisoqassaaq, tassani filmit tusagassiuutillu, inatsisilerineq aamma Issittumi ilisimatuutut misissuinerit eqqartorneqassallutik, Aaja Chemnitz oqarpoq.

Susassaqartut innuttaasullu kiisalu politikerit soqutiginnittut ataatsimeersuarnermi peqataasinnaassapput. Ataatsimeersuarnermi pilersaarutit komitep nittartagaani Facebookianilu kingusinnerusukkut saqqummiunneqassapput.

Powered by Labrador CMS