isumaqatigiissuteqarneq
Issittumi ilisimatusarnikkut Kinamik qaninnerusumik attaveqalerneq
Kalaallit Nunaat Kinalu issittumi ilisimatusarneq pillugu isumaqatigiissuteqarput, tamatumalu ilaatigut imarai ilisimatusarfimmik suleqatigiinneq aammalu ilinniagaqartunik ilisimatuunillu taarseeqatigiittarnissaq
Ilinniartitaanermut, kulturimut, ilisimatusarnermut ilageeqarnermullu Naalakkersuisoq Nivi Olsen (D) sapaatip akunnerani kingullermi State Oceanic Administration Beijing-imit (SOA) aamma Polar Research Institut China-mit, Kinap imarsiornermut oqartussaaffeqarfianit, kiisalu Institut for Polarforskningimit tikeraarteqarpoq, tikeraallu siuttoraat Deputy Administrator Mr. Chen Lianzeng (SOA).
Namminersorlutik Oqartussat tusagassiorfinnit nalunaarutikkut taamatut paasissutissiipput.
Suleqatigiinnermut periarfissat oqaluuseraat
Ilisimatusarnermut naalakkersuisoqarfik nalunaarpoq tikeraarneq aallartillugu Pinngortitaleriffik, Universiteti Asiarlu pulaarneqarsimasut. Kingorna ataatsimiittoqarpoq, tassani suleqatigiinnissamut periarfissat oqaluuserineqarlutik.
Ataatsimiinnerup kingorna isumaqatigiissut memorandum of understanding-imik taaneqartoq, Nivi Olsenimit Mr. Chen Lianzengimillu atsiorneqarpoq.
Taarseeqatigiinneq
Isumaqatigiissutikkut siunertarineqarpoq issuttumi ilisimatusarnermi Kalaallit Nunaat Kinalu qaninnerusumik attaveqaqatigiilernissaat, isumaqatigiissutillu ilaatigut ilagai ilisimatusarfimmik suleqatigiinnissaq aammalu ilinniagaqartunik ilisimatuunillu taarseeqatigiittarnissaq.
Mr. Chen oqalugiarnermini oqarpoq nunat taakkua marluk issittumi ilisimatusarnermi qaninnerusumik suleqatigiilernissaat pingaaruteqartutut isigigitsik.
– Naalakkersuisut sinnerlugit nuannaarutigalugulu tulluusimaarutigaara MoU-mik taassuminnga isumaqatigiissuteqaratta, taassumalu takutippaa ataqqeqatigiilluta suleqatigiinnissaq kissaatigigipput, Nivi Olsen tusagassiorfinnut nalunaarummi oqarpoq.