Torrak

Issittumi ilisimatusarnermi Pinngortitaleriffik siuttut ilagaat

Nordisk institut for studier af innovation, forskning og uddannelse-p nalunaarusiaata takutippaa Pinngortitaleriffik kunngeqarfimmi ilisimatusarfiit issuarnerpaasartut pingajorigaat

Ukiuni 2008-2011-mut Pinngortitaleriffik kunngeqarfimmi Danmarkimi issittumi ilisimatusarnermit ilisimatuussutsikkut allaaserisatigut issuarneqartarnerpaat pingajoraat. Niels Bohr Institutimit aamma DMI Danmarks Meteorologiske Institutimit qaangerneqarluni Pinngortitaleriffik nalilerneqarpoq kunngeqarfimmi ilisimatusarnermik ingerlatsiviit angusaqartarnerpaat ilaattut. Tamatumunnga tunuliaqutaavoq ukiuni 2008-2011-mut Pinngortitaleriffiup ilisimatuussutsikkut allaaserisat 107-t saqqummiussimammagit. Ilisimatusarnikkut angusat uuttorneqarajutttarput issuarneqarnerit amerlassusaasigut.
Tamanna takuneqarsinnaavoq nalunaarusiami qanittukkut saqqummersumi, Nordisk Institut for studier af innovation, forskning og uddannelsip suliarisimasaani. Nalunaarusiamik suliakkiisimavoq Danmarkimi Styrelsen for Forksning og Innovation, tassanil Kunngeqarfiup Danmarkip 2008-2012-imut issittumi ilisimatusarnera qulaajarneqarpoq. Qulaajaanermi sammineqarput Kalaallit Nunaanni, Savalimmiuni Danmarkimilu ilisimatusarnermik ingerlatsiviit immikkoortoqarfiillu katilugit 91-it.
Nalunaarusiap aamma takutippaa kunngeqarfiup Danmarkip issittumi ilisimatusarnerata 10 procentia Pinngortitleriffiup ingerlakkaa. Taamaasilluni 2013-imi kunngeqarfimmi Danmarkimi inuup ataatsip ukiumut suliarisimasaanit katillugit 611-init Pinngortitaleriffiup 61-it suliarsiimallugit kusanartumik normu 4-tut inissippoq. Taamaasilluni Pinngortitaleriffik ilisimatusarfissuit Aarhus Universitetip, Københavns Universitetip aamma GEUS-ip, De Nationale Geologiske Undersøgelser for Danmark og Grønlandip, kinguninnguinut inissippoq. Sulinermi angusat nalilerneqartarput ukiumut suliat amerlassusaasigut.
Naalagaaffeqatigiit issittumi ilisimatusarneranni Aarhus Universitet aamma Københavns Universitet aallussinersaapput; imaanilli aalisakkanillu ilisimatusarnermi, issittumi ilisimatusarfigineqartut annersaanni, Pinngortitaleriffik tamatuminnga ingerlatsinersaavoq Aarhus Universitet tullersortigalugu.
Nunarsuaq tamakkerlugu issittumi ilisimatusarnermi Danmarki nunat ilisimatusarnerpaat arfineq-pingajussaraat. Arfineq-pingajuattut inissisimagaluarluni Danmark Norgemut inorsartorujussuuvoq, tassa Norge Danmarkimit 75 procentimik amerlanerusunik saqqummiussaqartarmat. USA, Canada aamma Tuluit Nunaat issittumi pissutsit pillugit saqqummiussaqarnersaasarput. USA Danmarkip ilisimatusarnermi suleqataasa qaninnersaraat, tassa USA saqqummersitat sisamararterutaannik saqqummersitseqataasarmat.
Nalunaarusiap aamma takutippaa issittumi ilisimatusarneq nunarsuaq tamakkerlugu soqutigineqarnerpaajusoq, tassa allaaserisat issittumut tunngasut nunarsuaq tamakkerlugu agguaqatigiissitsinermi 26 procentimik akulikinnerusumik issuarneqartarmata.
Nunarsuup kissatsikkiartornera minnerunngitsumillu tamassuma Issittumut kinguneqaatai pissutigalugit ukiuni kingullerni tamaani aatsitassarsiornermut periarfissat uumassusillillu atorneqarnissaat sammineqarnerulersimavoq. Tamanna pissutigalugu Issittumi ilisimatusarneq sammineqarnerulerlunilu soqutigineqarnerulersimavoq.

Powered by Labrador CMS